DILI, (TATOLI) – Prezidente Konsellu Imprensa (KI), Virgílio Guteres, alerta ba jornalista sira atu kontinua kaer metin ba kódigu étika jornalista Timor-Leste bainhira halo kobertura iha kampaña eleitorál.
“Husu ba jornalista sira, primeiru kaer metin ba kódigu étika, cover both side (balansu), parte rua ne’e tenke hetan hotu sira-nia opiniaun iha ita-nia notísia”, Virgílio Guteres ba jornalista sira iha Fatumeta, ohin.
Tuir nia kuandu tama iha konflitu (diferente ideia) ka kontradisaun ruma iha périodu kampaña, jornalista tenke halo balansu.
“Jornalista rona lider A bainhira ko’alia ida ne’e ita tenke konfirma mós lider B atu hetan mós opiniaun, ne’e mak dehan cover both side”, afirma.
Virgílio rekoñese iha frakeza balun ligadu ho cover both side, tanba primeiru lider A ka B halo kampaña iha fatin ne’ebé jeografikamente la hanesan ka dook malu, entaun difísil ba jornalista sira hodi halo konfirmasaun.
“Entaun, se bele maluk sira (jornalista) komunika malu, bele titip (hameno) pergunta, meiu atu ultrapasa difikuldade ne’e”, dehan prezidente KI.
Nia esplika buat ne’ebé importante mós ba jornalista sira mak bainhira halo kobertura, labele tau atributu partidu nian, se tau atributu partidu nian, ne’e la’ós jornalista.
“Di’ak liu iha farda (mídia nian) bele ba ho farda, se la iha, ba ho kartaun jornalista nian”, Virgílio Guteres fó hanoin.
Jornalista sira mós presiza promove nafatin jornalizmu dame, tanba ne’e cover both side ne’e di’ak tanba envolve fonte sira hotu. “Cover both side ne’e ita husu loloos i labele dezvia ema (fontes) nia deklarasaun”, realsa.
Hodi hatutan: “Tanba ne’e mak konfirma, verifika, kuandu sira (fonte) uza liafuan sira ne’ebé ita la kumprende, ita husu”.
Antes ne’e, relasiona ho kobertura mídia nian iha eleisaun parlamentár, KI fó sai sira-nia rezultadu analíze no monitorizaun katak mídia iha TL kuaze iha infrasaun fonte únika ba fontes notísia hodi la kumpri prinsípiu universál jornalizmu kobre fonte rua hotu.
Notísia relevante seluk, klik: http://www.tatoli.tl/2017/08/ki-identifika-infrasaun-balansu-iha-publikasaun-midia/
Jornalista: Rafy Belo
Editora: Rita Almeida
