DILI, (TATOLI) – Bispu Dioseze Dili, Don Virgílio do Carmo da Silva, hatete atubele atrai ema mai vizita Timor-Leste, la’ós de’it haree ambiente ne’ebé moos no matak, maibé Timór tenke sai ema ne’ebé hatene hamnasa.
“Maibé labele hamnasa iha ibun, maibé laran ne’e hein iha nakukun atu tuda ema nia karreta. Oin hamnasa, iha kotuk buka dalan atu asalta ema, maibé ema tama iha ita-nia rai sente duni iha pás, serenidade no ida ne’e ita rasik mak kria duni kondisaun maski ita lako’alia barak mós ema mai haree fatin ida ne’ebé moos no matak, domin, dame, automátikamente sei atrai ema mai iha ita-nia rai”, bispu katak ida iha lansamentu feira loron-matan monu no vizita Timor-Leste 2030 ne’ebé organiza husi Ministériu Turizmu iha Kristu Rei, domingu, (8/4).
Hanesan vizaun no misaun ne’ebé hetete Lori Timór ba Mundu no Lori Mundu Mai Timór ida ne’e kompete duni ba ministériu nian atu lori mai, maibé atu halo Timór ne’e atrativu, furak la’ós depende de’it ba Ministériu Turizmu, maibé ba timoroan hotu.
“Ita infelizmente la’o dalabarak ita haree ita-nia sidade ne’e fo’er tebetebes. Lalika la’o dook, iha ha’u-nia odamatan kedan iha Lesidere, ita kuandu liu iha ne’ebá ema lahatene dehan ne’e tempat sampah tanba ita iha tiha ona mentalidade ida ita tuur iha ne’e hemu ákua ida, ita hamriik botil so’e hela ne’ebá, ita hamriik sigarru nia kulit so’e hela iha ne’ebá”, bispu dehan iha Kristu Rei.
Ida ne’e bainhira ko’alia atu promove kona-ba turizmu katak sidade ida ne’ebé moos, tasi ida ne’ebé moos la depende ba iha autoridade sira, maibé liuliu ba timoroan sira.
“Se ita hadomi ita-nia rai, hakarak Dili ne’e furak, ita hotu-hotu tenke hatuur ita-nia responsabilidade, maibé ita hein de’it hodi hatudu ita-nia liman ba membru Governu sé de’it mak ukun, ha’u hanoin maski Governu bele troka malu, maibé ita-nia mentalidade, atitude lamuda ha’u hanoin karik vizaun bele hela nafatin de’it”.
Aleinde ne’e, ambiente ne’ebé di’ak, moos, maibé matak mós. Bainhira to’o iha Dili, haree uluk mak foho ne’ebé maran tanba ema gosta tesik ai, maibé lahatene sentidu kuandu tesi ai-hun ida tesi filafali ka la’e ou tesi de’it atu halo Dili ne’e maran.
“Ita mós hakarak Timór ida ne’ebé matak no murak ne’e kabe ba ita hotu nia responsabilidade. Ida ne’e mak ita dehan promove turizmu, promove ambiente ne’ebé murak, ambiente ne’ebé di’ak”.
Jornalista: Maria Auxiliadora
Editora: Rita Almeida
