MANATUTU (TATOLI)—Premiadu Nobel Pás nian, José Ramos Horta, deside apoiu sekretáriu jerál partidu Fretilín, Mari Alkatiri tanba tuir nia haree atual Primeiru Ministru, Mari Alkatiri, nu’udar jestór di’ak atu hadi’a rai Timor.
“Buat ne’ebé aat iha tinan 10 liubá buka hadi’a, buat ne’ebé halo tiha ona, maibé ladi’ak buka hadi’a. Ha’u tanba sá apoia Alkatiri, apoia FRETILIN, ha’u lakohi tanba ideolojia ruma, ha’u haree ba ema ne’ebé bele kaer rai ne’e didi’ak, haree ba ema ne’ebé hatene halo jestaun iha Governu, hatene harii Estadu ho ain haat,” José Ramos Horta deklara iha abertura kampaña Partidu Fretilín, ohin iha Manatutu.
Tuir Ramos Horta programa FRETILIN mak hadi’a buat ne’ebé tenke hadi’a, harii buat foun ne’ebé tenke harii.
La’ós ida ne’e de’it, Adjuntu Sekretáriu Jerál FRETILIN, José Reis, hatutan oras to’o ona atu hametin sentidu Estadu, Estadu direitu demokrátiku no hametin Timor-Leste ida buras liután.
Oras to’o ona atu hapara figura iha Timor-Leste, maibé buka hametin organizasaun Estadu iha Timor-Leste.
Tanba ida ne’e, lori Fretilín nia naran dezafia Manatutu mak tenke manán ho boot liu hodi hatudu Manatutu defende Estadu direitu demokrátiku no la defende ema ida ka rua.
Sekretáriu Jerál Partidu Fretilín, Mari Alkatiri hatutan hodi dehan, Fretilin hili halo abertura kampaíña iha Munisípiu Manatutu tanba hakarak manan iha munisípiu refere bainhira realiza eleisaun antesipada. Ho mehi ida ne’e tuir oráriu kampaña Fretilin hili munisípiu Manatutu fatin hodi halo kampaña dala rua.
“Ha’u hakarak garante katak vitória FRETILIN iha Manatutu atu hahú iha Laleia, liuhusi Manatutu Vila no taka iha Laklubar hamutuk ho Laklo, Soibada no Natarbora”, Aktual Primeiru Ministru ne’e promete.
Tuir Alkatiri bainhira FRETILIN kaer ukun, sei hasai povu husi mukit. Hodi hatudu katak Fretilin ukun ho asaun.
Jornalista : Maria Auxiliadora
Editór : Manuel Pinto
