iklan

BAUCAU, MUNISÍPIU

Komunidade Uaioli Kontinua Preokupa Ba Infraestrutura Bázika

Komunidade Uaioli Kontinua Preokupa Ba Infraestrutura Bázika

Administradór Postu Administrativu Venilale, Carlos Alberto Guterres.

VENILALE, (TATOLI) – Atubele fa’an produtu lokál hodi hetan netik rendimentu maka  komunidade Venilale liuliu iha suku ka área rurál balun tenke la’o ho distánsia ne’ebé dook hodi to’o merkadu.

Uaioli, ezemplu husi suku ida ne’ebé mak remota liu iha postu administrativu refere. Asesu estrada atu lori produtu ba fa’an sei sai ezijénsia ida husi sira.

Administradór Postu Administrativu Venilale, Carlos Alberto Guterres, hatete husi Uaioli mai Venilale Vila la’o distánsia kilómetru 12.

“Husi Osogori, ne’e aldeia ida la’o kilómetru 15 mai to’o iha ne’e. Sira lori produtu atu mai fa’an”, katak Carlos iha nia edifísiu iha Venilale Vila, ohin.

Venilale maioria povu porsentu 85 moris ho vida agrikultór ne’ebé iha potensialidade iha kada suku barak atu fa’an. Oinsá mak atu hasa’e sira-nia produtu lokál atu kompete iha merkadu ne’e presiza hetan apoia husi tékniku agrikultura nian.

“Sira hakarak atu hetan osan tenke mai fa’an iha Venilale,  tanba labele fa’an iha rurál ne’ebá, se mak atu sosa?”.

Tanba de’it distánsia, atu fa’an sira-nia produtu komesa tuku rua madrugada tenke la’o ona ba merkadu ida ne’e mak nia problema, katak tan.

Tanba ne’e  mak estrada sai hanesan prioridade ba sira nomós água potavel. “Bee moos ne’e iha ajénsia balun ne’ebé hala’o ona mas parte balun seidauk asesu. Kona-ba eletrisidade iha suku ualu ne’ebé iha hotu ona só aldeia Osoake, suku Fatulia nian. Husi suku to’o Osoake ne’e la’o kilómetru 9 no to’o agora seidauk asesu ba naroman. Razaun tanba kompania no veteranu sira hadau malu nune’e lala’o to’o  agora, maibé espera katak Governu ba futuru sei fó atensaun ba ida ne’e”.

Sobre postu saúde, Venilale foin mak iha lima, maibé iha lamentasaun husi komunidade nafatin. “Uma doutór mós laiha depois atu halo tratamentu husi uma bá to’o iha ne’ebá tuku 12 ona. Presiza iha Governu mai ne’e oinsá atu kria uma ba doutór ba iha aldeia no suku sira ne’e”.

Entantu buat ne’ebé durante ne’e enfrenta maka karreta ambulánsia ne’ebé tinan 10 resin ona ne’ebé foin daudaun kuaze fulan neen para tiha de’it, maibé sobre edukasaun iha postu refere la’o ho di’ak.

Eugenia negosiante ne’ebé hela iha Berkoli no fa’an aifuan no modo iha Venilale ne’e hatete la’o kilómetru haat hodi lori produtu ba duak no dalaruma sa’e karreta.

“Maibé merkadu ne’e ladún seguru ba ami no ami fa’an sasán ne’e ladún folin. Ami mai fa’an ne’e bainhira to’o merkadu tanba estrada ladún di’ak entaun sasán sira dodok hotu ona kundu to’o iha fatin, tanba ne’e ami-nia preokupasaun mak bele ajuda ami-nia estrada sira ne’e atu ami bele la’o ba fa’an karik estrada di’ak ba ami hodi la’o”.

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!