DILI, (TATOLI)—Estudante departamentu Komunikasaun Sosiál, Universidade Orientál Timor Lorosa’e (UNITAL), iha ámbitu komemorasaun liberdade imprensa, fó solidariedade ba família enlutada na’in hitu ne’ebé mate iha Kabul, Afeganistaun, 30 Abríl 2018, tanba bomba bainhira hala’o kna’ar jornalizmu nian.
Jornalista na’in hitu ne’e mak Ali Salimi (operadór kamera Mashal TV), Ebadullah Alamzai (reporter rádiu Azadi), Ghazi Rasouli, (reporter 1TV), Nowruz Ali, (operadór kamera 1TV), Salim Talash (reporter Mashal TV), Shah Marai (fotografer AFP) no Yar Mohammad Tokhi, (operadór kamera Tolonews), inklui selseluk tan.
“Hakarak hato’o ami-nia sentidu kondolénsias ba família jornalista sira iha Afeganistaun,” hateten estudante Komunikasaun Sosiál, Sidónia Fernandes, iha Kampus UNITAL, Becora-Díli, ohin, ba Ajénsia TATOLI.
“Enkoraja nafatin família vítima, hamutuk hasa’e orasaun, nune’e sira bele hakmatek iha mundu seluk,” hateten tan estudante ne’e.
Inocêncio Guterres, estudante Komunikasaun ida mós hato’o nia solidariedade ba vítima profisionál komunikasaun sosiál sira ne’e.
“Sentidu kondolénsias ba jornalista sira ne’ebé hetan atentadu iha Afeganistaun. Ho respeitu mós hato’o ami-nia sentidu ba família no lider husi nasaun ne’e,” dezeja estudante semester neen, ne’e.
Estudante seluk, Bernabé dos Reis Salo mós hato’o nia sentidu pezame mós ba família enlutada Afeganistaun ne’e.
“Ha’u nu’udar estudante komunikasaun sosiál UNITAL, hato’o ha’u-nia sentidu kondolénsias ba jornalista sira iha Afeganistaun basá esforsu buka informasaun, to’o fó sira-nia aan ba mate tan de’it buka lia loos,” akresenta estudante Barnabé.
Agostina Bosco dos Santos, estudante Komunikasaun Sosiál ida mós espresa nia sentimentu solidáriu.
“Ha’u-nia sentimentu ba família jornalista sira katak ho kbiit no forsa nafatin hodi simu realidade ida ne’ebé mak akontese ona ba família. Sentidu pézame ba família enlutada,” dezeja estudante Agostina Bosco.
Estudante Komunikasaun Sosiál, Fakuldade Siénsia no Polítika [CISPOL], UNITAL mós hato’o sira-nia solidariedade ba jornalista timoroan no internasionál sira ne’ebé mate iha Timor-Leste, tanba hakarak haklaken informasaun kona-ba kauza Timor nian ba independénsia iha períodu okupasaun no seluk tan, hodi komemora loron liberdade imprensa, 3 maiu 2018.
Jornalista sira ne’e mak hanesan, istorikamente, iha 26 Agostu 1999, jornalista Bernardino Guterres mate bainhira hala’o nia serbisu. Iha 21 setembru, jornalista Sander Thoenes husi olanda hetan oho iha Becora, Díli.
Tuir mai, jornalista Asia Press husi Indonézia, Agus Mulyawan mós mate iha 25 setembru 1999 iha Lospalos.
Iha 16 outubru 1975, jornalista Greg Shackleton, Tony Stewart, Brian Peters, Malcolm Rennie no Gary Cunningham mós mate, iha Balibo.
Iha 12 Novembru 1991, Kamal Bamadhaj, jornalista akadémiku ida, orijen Malázia ne’ebé eskola iha Austrália mós mate tanba kauza husi situasaun Timor nian iha tempu ne’ebá.
Iha 8 dezembru 1975, jornalista Freelance husi Austrália, Roger East hetan oho husi militár indonézia iha ponte kais, Díli bainhira halo invazaun mai Timor iha tempu ne’ebá. Iha fulan hanesan, Francisco Borges da Costa mós mate tan konsekuénsia husi situasaun hanesan.
Ho kronolojia sira ne’e, antes ne’e, prezidente Konsellu Imprensa [KI], Virgílio Guterres fó hanoin ba jornalista timoroan sira hotu katak Ita valoriza jornalista sira ne’e nia sakrifísiu hodi kontinua hala’o servisu ne’ebé sira hatudu liuhusi kualidade iha ita jornalista nia servisu, hatudu commitment [kompromisu], dedikasaun ba servisu sira ne’e hodi buka lia loos.
Jornalista: Rafy Belo
Editór : Manuel Pinto
