DILI, (TATOLI) – Ministru Administrasaun Estatal, Valentim Ximenes, hatete preparasaun Ministériu Administrasaun Estatal (MAE) hasoru eleisaun parlamentár husi loron dahuluk prosesu eleitorál tomak to’o resenseamentu eleitorál, rejistu partidu polítiku no kandiadatu ba deputadu no tama iha finál kampaña buat hotu la’o ho di’ak.
“Tanba Maromak ajuda ita. Segundu, imi jornalista sira mós ajuda halo kobertura di’ak, fó informasaun di’ak. Imi komesa iha balansu kobertura maski facebook ema ko’alia buat aat mak barak, pelu menus mídia fó ona aparesu boot ba prosesu hotu la’o di’ak tebes. Ne’e ita labele nega, tanba ne’e ha’u agradese imi mídia tomak”, Valentim hatete iha Balide, ohin.
Aleinde ne’e konta mós ho povu nia maduru no nia partisipasaun no kontribuisaun aas tebes ba iha prosesu hotu.
“Agora ita hein rezultadu eleisaun mai ne’e oinsá no ha’u apela ba populasaun hotu katak hotu-hotu sai husi uma ba sentru votasaun atubele fó sira-nia direitu votu atu deside futuru Estadu ho parlamentu no governu nia kualidade”.
Nu’udar responsavel polítiku másimu ba eleisaun ida ne’e, laiha dúvida no fiar katak ho mídia, Maromak, matebian no povu tomak nia tulun eleisaun ida ne’e sei iha rezultadu di’ak.
“Ha’u fó agradesimentu ba Governu anteriór ba eleisaun tinan kotuk la’o di’ak no ha’u-nia parte hakarak ho ambisaun boot atu halo di’ak liu saida mak halo iha 2017”.
Jornalista: Maria Auxiliadora
Editora: Rita Almeida
