DILI, (TATOLI) – Diretór Jerál Servisu Koperativu, Ministériu Administrativa Estatál (MAE), Edgar Sequiera Martins, hateten Governu la konvida bainaka espesiál hosi rai-liur hodi komemora loron restaurasaun independénsia 20 maiu 2018 ba dala-15, tanba falta orsamentu no eleisaun antesipada.
Komemorasaun ne’e sei partisipa hosi Prezidente Repúblika, Francisco Guterres Lú Olo, Prezidente Parlamentu Nasionál, Aniceto Guterres, Primeiru-Ministru, Marí Alkatiri, Prezidente Tribunál Rekursu, Deolindo dos Santos, Bispo Dioseze Dili, Maliana no Baukau, Veteranu sira, korpu diplomátiku no seluk-tán.
MAE mós organiza iha postu administrativu no munisípiu 12 inklui Rejiaun Autónomu Espesiál Oe-kusi.
“Governu aloka orsamentu hamutuk rihun 380, kada munisípiu aloka $1500 no posto administrativu $750”, hatete ba Tatoli iha edifísiu MAE Kaikoli, ohin.
Edgar hatutan MAE hala’o ona preparasaun, liliu ba ekípa isar bandeira, grupu koru no preparasaun seluk ne’ebé lokaliza iha Palásiu Governu.
Tuir planu iha loron 18 maiu sei iha misa agradesementu ne’ebé prezide hosi Bispu Dioseze Dili, Don Virgilio do Carmo da Silva, iha Igreja Motael, no iha loron 19 kalan sei hala’o kalan kultura iha Lecidere.
Jornalista: Agapito dos Santos
Editora: Rita Almeida
