DILI, (TATOLI) – Diretór Jerál Servisu Koperativu, Ministériu Administrasaun Estatál (MAE), Edgar Sequiera Martins, hateten servisu administrasaun la la’o tanba eletrisidade iha ministériu mate hahú segunda horiseik.
“Konserteza ho akontesementu ne’e afeita uitoan ita nia servisu, tanba desde horiseik lokraik to’o ohin eletrisidade mate, informasaun trafo eletrisidade ida liga edifísiu MAE ho Komisaun Nasionál Eleisaun (CNE-sigla portugés) maka aat”, dehan dirijente ne’e iha edifísiu MAE Kaikoli, ohin.
Maske nune’e, funsionáriu públiku iha ministériu ne’e kontinua halo servisu hodi atende públiku. “Ami kontinua servisu hodi atende públiku maske eletrisidade mate”.
Hatan ba problema ne’e, Diretór Jerál Eletrisidade Timor-Leste (EDTL), Virgilio Fátima Guterres, rekoñese kauza ne’e akontese tanba transformadór espesiál ne’ebé instala hodi liga ministériu no CNE maka avaria.
Servisu Téknika seidauk halo prosesu manutensaun tanba sei afeta ba prosesu apuramentu ba rezultadu eleisaun antesipada. “Ahi mate iha Estatal ne’e tanba tranformadór ne’ebé instala iha ne’eba, ami atu hadi’a mas agora apuramentu nasionál iha CNE”.
Edgar akresenta sei halo mauntensaun hafoin CNE finaliza prosesu apuramentu nasionál iha semana ne’e.
Jornalista: Agapito dos Santos
Editora: Rita Almeida
