iklan

NASIONÁL, COVALIMA, DILI, MUNISÍPIU

Esénsia Komemorasaun Restaurasaun Independénsia maka Hametin Pás

Esénsia Komemorasaun Restaurasaun Independénsia maka Hametin Pás

Seremónia isár bandeira iha Munisípiu Covalima, Imajen Tatoli/Dok

COVALIMA (TATOLI)–Administradór Munisípiu Covalima, Afonso Nogueira Nahak hateten esénsia hosi Komemorasaun Loron Restaurasaun Independénsia Timor-Leste ba dala XVI ba komunidade Covalima maka hametin estabilidade, pás no unidade.

“Esénsia hosi loron importante ida ne’e ba ami Covalima maka hametin estabilidade, pás no unidade hodi kontribui ba dezenvolvimentu Covalima,” Afonso hato’o asuntu ne’e bainhira partisipa iha Komemorasaun Loron Restaurasaun Independénsia ba dala XVI ne’ebé hala’o iha Kampu Futeból Ladi, Suai, Munisípiu Covalima, Domingu dadeer ohin.

Nia haktuir pás no estabilidade ne’ebé la’o iha komunidade nia leet buras tebes, ezemplu, iha eleisaun antesipada liu-ba la akontese problema iha Covalima, katak, povu Covalima hakmatek no hamutuk atu dezenvolve Covalima.

“Ha’u hanesan administradór apela ba komunidade Covalima katak ita ne’e ema ida de’it, hanoin ida de’it, kaer liman malu nafatin atu dezenvolve lisuk rai Covalima,” nia apela.

Lider munisipál ne’e fó agradese wa’in ba komunidade Covalima ne’ebé festeja eventu ida ne’e, la’ós de’it iha kapitál Suai maibé iha postu administrativu neen iha Covalima laran.

Afonso informa atividade hodi komemora loron refere lahanesan baibain tanba orsamentu hosi Governu oi tuan de’it no hetan apoiu finanseira balun hosi negosiante no kompañia sira ne’ebé hala’o serbisu iha Covalima.

Atividade ne’ebé Governu lokál hala’o iha Covalima maka hanesan halai taru ne’ebé involve hosi labarik sira, demonstrasaun silat, dansa tradisionál no selu-seluk tan.

Jornalista: Xisto Freitas

Editór : Manuel Pinto

iklan
iklan

Leave a Reply

iklan
error: Content is protected !!