DÍLI, (TATOLI)-Hela tan semana ida, mundu no Timor-Leste (TL) komemora loron mundiál ba labarik nian, ba dala-93, sura hahú proklamasaun UNICEF (United Nation International Children Fund), iha 1925 iha Jenebra. Repezentante UNICEF iha TL hakarak labarik hotu iha mundu no TL bele moris ho poténsia.
“Ha’u-nia espetativa ba labarik idaidak iha Timor-Leste mak iha kresimentu, bele moris potensialmente,” dehan reprezentante UNICEF, iha TL, Valerie Taton ba Ajénsia TATOLI, iha otel Vila Verde, ohin.
Tanba ne’e, atu to’o objetivu ida ne’e, nia akrsenta katak ita hotu tenke halo investimentu ba labarik sira no tau atensaun másimu ba labarik sira-nia edukasaun, nutrisaun, sanitasaun no seluk tan.
“Haree oportunidade, iha Timor-Leste, ita haree progresu no progresu ne’ebé rápidu, liliu hatuun mortalidade,” rekoñese reprezentante UNICEF, Valerie Taton.
Nia informa mós katak komemorasaun loron mundiál ba labarik sira, ne’ebé monu iha 1 juñu kada tinan ne’e, nu’udar loron ida importante tebes no tau iha konsiderasaun.
“Loron ne’e importante tebes, ita sei tau labarik sira iha prioridade hodi hanoin hikas buat oioin kona-ba labarik sira. Tanba ne’e ami (UNICEF) hakarak investe kada labarik no kontinua haree ba dezenvolvimentu labarik nian, iha Timor-Leste,” haklaken Valeria Taton.
Labarik Hala’o Dever, Goza Direitu
Ezatamente Loron 1 fulan juñu nu’udar loron mundiál ba labarik tomak, espera katak labarik sira oinsá hala’o dever, goza vida hanesan labarik iha ne’ebé de’it, tantu iha rai riku no rai sira ne’ebé mak avansadu. Husik labarik sira goza direitu hanesan umanu.
Deklarasaun ne’e fó sai husi Sekretáriu Estadu Komunikasaun Sosiál, Matias Boavida, iha marjen sorumutu ho media, organiza husi SEKOMS (Sekretáriu Estadu Komunikasaun Sosiál) no UNICEF, iha otel Vila Verde, Díli, ohin.
“Prinsipalmente iha Timor-Leste, ita espera la’o di’ak de’it. Ha’u pesoalmente, dala ida tan apela ba família tomak katak dever atu bele proteje ki’ik oan sira, la’ós estadu de’it maibé mós dever inan-aman nian oinsá atu bele proteje, fó biban tomak atu nune’e sira (labarik) bele goza sira-nia vida hanesan labarik, hanesan mós labarik sira iha mundu raiklaran,” dehan governante ne’e.
“Nune’e, governu iha situasaun ida hanaran jestaun, apoiu tomak ba oan no alinoan sira, labarik sira ne’ebé mak otas atu halimar. Kuandu buat ne’ebé iha fó ba inan-aman sira, fó kna’ar tomak, biban tomak ba sira atu goza liberdade; hakarak halimar, ko’alia, tuir buat ne’ebé iha,” nia reforsa tan.
Kona-ba aktu ne’ebé akontese ba labarik sira, liliu hetan baku husi ema balun, iha tempu ikus ne’e, sekretáriu estadu ne’e konsidera nu’udar preokupasaun ida ba ita hotu, nu’udar sosiedade timoroan.
“Ida ne’e mak sai hanesan preokupasaun boot ba ukun na’in sira atu bele oinsá, protesaun ne’ebé di’ak, liuhusi dalan ida oinsa estabelese regulamentu ne’ebé bele defende, proteje sira (labarik) atu nune’e labele sai vítima ba polítiku sira, ema boot sira (adultu-red), atu nune’e labele manipula sira-nia direitu hanesan mós labarik sira iha mundu raiklaran,” nia esplika.
Entretantu, tuir dadus UNICEF nian hatudu katak labarik rihun 275 iha Timor-Leste, hahú husi tinan walu mai karaik presiza moris ho poténsia tomak.
Jornalista: Rafy Belo
Editor : Manuel Pinto
