DILI, (TATOLI) – Estudante ativu primeiru Departamentu Komunikasaun Sosiál (DKS), Universidade Orientál Timor Lorosa’e (UNITAL) na’in 32, ne’ebé hahú estuda iha tinan létivu 2015, sei komesa estájiu profisionál iha instituisasaun mídia, durante fulan ida. Hahú loron ualu juñu to’o 30 jullu 2018.
“Ita-boot sira ba adaptasaun. Ita-nia kuliah (aula) babain iha universidade, saidak mak iha rai hela iha universidade. Ba ho komportamentu di’ak, manan konfiansa husi instituisaun sira”, xefe departamentu DKS, Martinho Mendes ba estudante estajiadu sira ne’e, iha kampus UNITAL, Bekora, ohin.
Xefe departamentu ne’e hateten hanesan diretór ba iha DKS ninian, sei monitoriza de’it atividade estájiu estudante sira nian, maibé iha estájiu nia laran responsabilidade iha estudante idaidak hodi hatudu ninia prestasaun.
“Ikus liu, imi di’ak liu koopera hamutuk hodi manan konfiansa, iha publiku nomós iha instituisaun refere”, hamenu ezekutivu, Martins Mendes, hafoin fahe atributu estájiu ba estudante DKS-UNITAL, 32.
Dekanu Fakuldade Siénsia Sosiál no Polítika, Alváro da Silva, ne’ebé partisipa iha serimónia atribuisaun atributu husi departementu ba estájiadu sira hateten, estájiu profisionál ne’e atu ajusta téoria ho prátika iha kampu, oinsa atu bele manan esperiénsia; bainhira ba iha kampu traballu.
Dekanu Alváro da Silva mós husu ba estudante sira atu hatudu koñesimentu hanesan ema intelektuál tanba produz husi universidade mezmu seidauk remata. Bainhira estudante sira hatudu intelektualidade, instituisaun sira bele hatene méritu estudante sira nian.
Maske nune’e atu hetan ida ne’e depende ba pesoál idaidak. “Hatudu kapasidade, hatudu disiplina”, salienta dekanu ne’e.
Nia mós fó hanoin ba estudante DKS sira ne’e katak hatudu kapasidade no kualidade ba empregadór sira no hatudu mós dalan di’ak ba futuru estudante komunikasaun sosiál sira, iha tinan létivu sira tuir mai, tanba estudante estajiadu sira ne’e nu’udar estudante dahuluk nune’e presiza sai matadalan.
Nune’e mós, husu nafatin ba estudante na’in 32 ne’e, atu justifika sira-nia kualidade liuhusi prestasaun, hodi bele hatudu ba publiku katak UNITAL mós iha kapasidade.
“UNITAL ema hatene iha publiku katak la iha kapasidade, UNITAL ne’e rai rahun, UNITAL ne’e universidade ne’ebé iha kotuk liu, mas se ita-boot sira justifika ba publiku liliu ita-boot sira-nia estájiu profisionál ne’e, ema bele konfia katak UNITAL la’ós rai rahun, maibé produz estudante ho kapasidade hodi bele kontribui ba área ne’ebé aban bainrua (estudante) sei kontribui ba”, sujere dekanu Alváro da Silva.
Entretantu, tuir observasaun Ajénsia TATOLI katak estudante estájiadu sira ne’e demonstra sira-nia entuziazmu no kuriozidade hafoin esplikasaun kona-ba prosesu administrativu DKS nian, sujestaun no konsellu husi autoridade Fakuldade Siénsia Sosiál no Polítika-UNITAL.
Jornalista: Rafy Belo
Editora: Rita Almeida
