Timor-Leste La Loke Embaixada Barak Tanba Limitasaun
DILI, (TATOLI) – Haluan Timor-Leste nia relasaun diplomátika ho rai seluk, governu no estadu Timor-Leste iha planu, maibé tanba limitasaun Timor-Leste labele loke embaixada barak demais, iha mundu.
“Atu haluan ita-nia relasaun ho rai seluk tenke aumenta tan ita-nia embaixada mas haree ba ita-nia forsa, ita-nia limitasaun sira ne’e, ita labele loke barak demais. Ita rai kiikoan, ita-nia diplomata mós seidauk sufisiente”, dehan vise-ministra negósiu estranjeiru no kooperasaun, Adalgiza Magno, iha Ministériu Negósiu Estranjeiru no Kooperasaun (MNEK), Praia dos Coqueiros, ohin.
Relasaun internasionál, Timor-Leste ninian, define no konsagra iha Konstituisaun Repúblika Demokrátika Timor-Leste (RDTL), artigu 8o ho deskrisaun hamutuk iha alinea haat.
“Purtantu, iha planu atu loke embaixada iha India, maibé parese tinan rua tolu tan. La’ós agora tanba haree ba ita-nia situasaun polítika, ita-nia preparasaun loloos. Sei la loke iha rai barak, haree ba limitasaun ne’ebé mak iha”, akresenta governante ne’e.
Vise-ministra Adalgiza Magno, relata agora embaixada 16 mak nia rezidénsia iha Timor-Leste enkuantu barak nia reprezentasaun iha nasaun seluk.
“Balun iha Malázia, Singapura, barak liu mak iha Indonézia. Ne’e kuaze atus ida,” nia informa.
Vise ne’e informa tan, embaixada sira ne’e, nia kooperasaun ho Timor-Leste iha área oioin de’it.Portugal iha edukasaun, governasaun di’ak. Amérika programa barak. Purtantu, programa iha oioin de’it. Xina no Japaun ajuda konstrusaun, inklui husi nasaun seluk tan.
“Ne’e ita-nia parseiru importante, ne’e para ita bele hametin ita-nia relasaun tanba ita presiza malu”, nia konklui.
Jornalista: Rafy Belo
Editora: Rita Almeida
