DILI, (TATOLI) – Diretór Jerál Autoridade Aduaneira (AA), José António Fátima Abílio, hatete reseita ne’ebé Alfándega rekolla ona iha 2018 (janeiru-juñu) menus liu bainhira halo komparasaun ho tinan sira uluk.
“Alfándega kolleta reseita ba importasaun iha portu ba sales tax and excise tax tinan-tinan númeru ne’e sa’e, maibé 2018 nian agora ita foin konsege hetan millaun 23 resin. Se ita halo komparasaun ho tinan sira kotuk ne’e ho kolleta reseita tinan ne’e menus liu”, José hatete iha eis edifísiu Ministériu Planu no Finansas, ohin.
AA ne’ebé depende liu ba importasaun kuandu nia volume maka’as nia hetan reseita barak no importasaun sira ne’ebé kona excise tax barak maka reseita mós sa’e, mas bainhira menus entaun kolleta mós tun.
“Iha excise tax iten (item) sanulu ne’ebé maka ita halo, maibé haree katak iha excise tax ne’e liuliu alkol ho tabaku. Tabaku ita iha dekretu lei husi Ministériu Saúde kona-ba kontrolu tabaku ne’ebé ami komesa implementa signifika importasaun komesa redús ona tanba ba saúde públika entaun excise husi tabaku komesa redús, depois excise seluk ne’ebé boot mós husi serveja”.
Tanba prezensa Heineken ne’e daudaun iha Timor-Leste automátikamente importasaun sira ne’ebé hanesan Tiger, Bintang, ABC ho Heineken rasik agora ne’e liuhusi investimentu ida ne’e no taxa ne’ebé aplika mós ki’ik, signifika iha termu excise ba serveja mós menus.
“Governu iha polítika para halo invetsimentu ne’e no lei investimentu ne’ebé fó ba investór sira iha izensaun ba kapitál klaru que afeta mós ba impostu, maibé singifika ita bele hetan nia retornu ba tinan sira tuirmai”.
José hatutan sobre importasaun ne’ebé menus bele mós haree ba kestaun polítika iha rai-laran ne’ebé sai hanesan barómetru para importadór sira atu importa mai, maibé iha fulan neen tuir mai fali depois Governu forma tiha sei haree reseita ne’e sa’e ka la’e.
“Ita espera bele sa’e tanba normalmente tama iha fin anu ne’e volume importasaun sempre barak”.
Diretór Jerál afirma en jerál reseita sira ne’ebé rekolla to’o fulan hanesan ne’e to’o ona millaun 30 resin, mas daudaun iha de’it millaun 23 liu.
“Hanesan ita haree iha 2017 totál reseita iha millaun 75 signifika husi 75 ne’e iha trimestre ida ita kobra liu 20, satán trimestre rua, signifika iha semestre ida metade ita kobra ona hanesan ne’e mós iha 2016 millaun 75 hotu”.
Jornalista: Maria Auxiliadora
Editora: Rita Almeida
