DILI, (TATOLI) – Governu liuhosi reuniaun Konsellu Ministru (KM), aprova ona proposta lei ida ne’ebé aprezenta husi Ministériu Finansas (MF), atu bele halo transferénsia orsamentu husi fundu petrolíferu ba kofre Estadu hodi garante funsionamentu mákina Estadu.
“Ohin husi Ministériu Finansas halo aprezentasaun no ko’alia kona-ba asuntu situasaun ba likidez Estadu no tuir mai iha duni desizaun husi Konsellu Ministru, hodi passa proposta lei ida ne’ebé mak husu autorizausaun espesiál atu bele transfere osan husi ita nia fundu petrolíferu mai kofre Estadu”, katak Ministru Reforma Lejislativa no Asuntu Parlamentár, Fidelis Leite Magalhães, ba jornalista sira iha Palásiu Governu, hafoin reuniaun KM, ohin.
Fidelis hatutan agora dadauk iha kofre Estadu iha de’it milliaun $20, tanba ne’e ohin iha reuniaun KM husu tan autorizasaun hodi transfere osan husi fundu petrolíferu ba kofre Estadu ho montante milliaun $140.
“Mekanizmu ne’ebé mak ami opta liuhosi proposta lei, ne’ebé sei haruka ba parlamentu hodi hetan aprovasaun, hafoin promulgasaun atu iha lei ida”, tenik.
Governante ne’e akresenta atu transfere osan husi fundu petrolíferu, governu tuir dalan ne’ebé lei haruka ba pedidu transferénsia orsamentu.
“Ami la halo tuir dalan ne’ebé hatún de’it sein informa autorizasaun husi Parlamentu Nasionál, maibé ami halo tuir dalan ne’ebé tuir lei haruka ba pedidu transferénsia orsamentu husi fundu petrolíferu mai iha kofre Estadu”, katak.
Ministru hatutan tan iha rejime doudésimu ne’ebé adopta agora, fahe ba fulan 12 no tuir kálklu fulan ida hetan milliaun $70, nune’e pedidu ohin milliaun $140, ho antisipasaun ba fulan rua (jullu no agostu).
Governante ne’e akresenta lei ne’ebé aprezenta bainhira Orsamentu Jerál Estadu tama ona em vigor, automátikamente transfere fali ba orsamentu normál.
“Lei ne’e ho karakter katak bainhira orsamentu jeral estadu ba 2018 passa para bele kontinua sustenta mákina estadu to’o dezembru, ida proposta $140 milloens tuir lei ne’ebé propoin ba ne’e nia automátikamente la vale ona”, konklui.
Jornalista: Julia Chatarina
Editora: Rita Almeida
Husu Nai Representante povu iha uma Fukun Parlemento ho neon Nasionalista para aprova Lei transfrensia nee, hodi grantia estanilidade makina estado nian ba oin.