DÍLI, (TATOLI)-Organizasaun Nasaun Unida ba Edukasaun, Siénsia no Kultura, (UNESCO-sigla inglés) liuhusi Konsellu Imprensa (KI) Timor-Leste (TL) konvida péritu multimedia husi Dewan Pers (Konsellu Imprensa), Indonézia, Imam Wahyudi, hodi apoia formasaun multimedia, liliu produsaun video, ba estudante DKS (Departamentu Komunikasaun Sosiál), Universidade Orientál Timor Lorosa’e (UNITAL).
Formasaun ne’e sei hala’o durante semana rua, hahú ohin to’o 30 jullu 2018, iha kampus Fakuldade Siénsia Sosiál (FSS), Universidade Nasionál Timor Lorosa’e (UNTL), laboratóriu DKS UNTL; identifikadu husi KI ho UNESCO parseria mós ho UNTL.
“Ba dahuluk, ha’u hato’o bemvindu ba formadór Imam Wahyu. Ha’u agradese mós ba KI, la ho sira-nia apoiu, atividade formasaun sei la bele la’o. Ha’u imajina, tanbasá bele akontese (formasaun-red) ida ne’e? mezmu atividade ne’e ki’ik maibé iha signifikasaun ne’ebé boot,” dehan xefe departamentu DKS, Martinho Mendes, iha Kampaun Nasaun Unida, Caicoli-Díli, hodi kalan, segunda (16/07).
Xefe departamentu ne’e mós hato’o obrigadu wa’in ba prezensa formadór KI Indonézia, tan bele ajuda mós sira-nia departamentu. Nia mós rekoñese katak DKS UNITAL iha limitasaun, liliu iha rekursu umanu, inklui mós estudante sira-nia limitasaun.
“Nune’e, ha’u nu’udar diretór ba Komunikasaun Sosiál apresia tebes ho prezensa ita-boot nian (Imam Wahyu-red),” apresia ezekutivu DKS UNITAL, Martinho Mendes.
Xefe departamentu Martinho Mendes mós hameno ba estudante DKS UNITAL sira katak aproveita didi’ak oportunidade ne’ebé mak péritu KI Indonézia, Imam Wahyudi, sei oferese durante semana rua ne’e.
“Ha’u hameno ba alin sira, aproveita ba oportunidade ida ne’e, hahú ohin, to’o durante semana rua, iha ita-nia atividade ne’e, ita tenke hanoin katak ne’e ba ita-nia di’ak tanba ita mak presiza, nune’e atu atinji objetivu ne’e ha’u-nia alin sira (estudante) aproveita ba oportunidade ne’e, atu benefísia iha futuru ka bainhira remata tiha ona estudu, hodi bele fó benefísiu ba sosiedade ne’ebé imi pretense ba,” nia fó hanoin.
Reprezentante KI, Ana Siqueira, iha nia intervensaun hateten KI iha atu fó apoiu mós ba DKS UNITAL nune’e mós UNTL. Tanba ida ne’e, KI dalabarak mós ko’alia ho UNESCO hodi fó oportunidade ba estudante sira basá konsidera iha sala laran aprende teória barak maibé abilidade laduun barak. Ita la’o neneik, importante ita atinji buat balun.
“Tanba ne’e, ha’u hanoin katak formadór Imam Wahyudi iha ne’e, ami dalabarak serbisu ho Dewan Pers (Konsellu Imprensa) Indonézia, sira mós ajuda Konsellu Imprensa barak, ho ema ne’ebé ho skill (abilidade) maka’as para atu bele fahe ba ita,” dehan diretora KI ne’e.
Diretora Ana Siqueira espera katak ho formasaun ne’e bele hasa’e abilidade iha parte prátik ninian.
“Ne’ebé, ha’u hakarak hato’o agradese ba UNESCO mós, Konsellu Imprensa hanesan fasilita de’it. Ne’ebé, ita hato’o ita-nia agradese ba UNESCO hodi lori formadór Imam Wahyudi mai hodi apoiu alin sira iha Timor-Leste. Tanba ne’e, ha’u hato’o mós ha’u-nia benvindu,” agradese diretora.
Iha fatin hanesan, reprezentante UNESCO, Sizuke afirma katak media nia funsaun ba nasaun importante tanba ne’e estudante DKS nia funsaun mós importante.
“Timor-Leste iha joven barak. Nasaun barak la iha iha oportunidade hanesan ne’e. Imi-nia estudu sei kontribui ba Timor-Leste nia demokrasia. Ha’u espera katak imi bele aprende halo didi’ak,” akresenta reprezentante UNESCO ne’e.
Entretantu, abertura ba atividade formasaun ne’e, asiste direta mós husi reprezentante dekanu Fakuldade Sispol, UNITAL, vise-dekana, Felicidade Xavier.
Formasaun ne’e rasik alende destina ba estudante DKS UNITAL, antes ne’e, hala’o mós ba estudante DKS UNTL, ho durasaun tempu ne’ebé mak ekivalente.
Jornalista: Rafy Belo
Editór : Manuel Pinto
