DILI, (TATOLI) – Governu liuhosi Sekretáriu Estadu Komunikasaun Sosiál, Merício Juvinal dos Reis Akara, husu ba orgaun komunikasaun sosiál iha Timor-Leste atu públika informasaun ne’ebé kredivél hodi halakon informasaun falsa.
“Mídia iha Timor-Leste kompetetivu tebes, tanba ne’e atu públika informasaun tenke ho kredivél no halakon informasaun ne’ebé la loos”, governante ne’e hatete iha ninia diskursu bainhira selebra ezisténsia mídia Televizaun Edukasaun Timor-Leste (Tve TL) inkluindu lansamentu ba Frekuénsia Satelite Palapa, kalan ne’e.
Governu haksolok tebes ba serimónia ezisténsia Tve-TL ba tinan tolu, tanba kontribui fó informasaun, edukakasaun no diverte ona públiku. Nune’e governu iha kompromisu apoia orgaun komunikasaun sosiál atu haburas demokrásia no harii pás.
Nune’e, Estadu garante liberdade imprensa atu mídia sira bele fó informasaun ne’ebé loos ho objetividade.
Maibé iha mundu globalizasaun hamosu mós konverjénsia mídia nu’udar prosesu ida atu transforma pensamentu públiku liuhosi internet hanesan mídia sosiál facebook, twitter, no seluk tan ne’ebé lais, tanba mídia profesionál kompetetivu tebes.
Maske nune’e, maibé mídia TL mós tuir rítmu dezenvolvimentu globalizadu. Ho nune’e, programa governu da-ualu nian sei apoia no reforsa Ajénsia Notisioza Tatoli, reforsa Konsellu Imprensa, kontinua apoia Rádio Televizaun Timor-Leste, sei estabelese institutu jornalista no seluk tan.
Tanba ne’e, governu kompromete koopera ho mídia sira atu kontribui ba prosesu tomak liuhosi informasaun ne’ebé sufisiente ba povu.
Parte seluk, Prezidente Autoridade Nasionál Komunikasaun, Antonio Correia, agradese ezisténsia TVe-TL hodi sai matan ibun ba sosiedade. Aproveita oportunidade ne’e, Antonio Correia entrega sertifikadu nu’udar lisensa ba Tve-TL.
Nia afirma nasaun ne’e sei joven, presiza hothotu nia kontribuisaun ho responsabilidade liuhosi regra no norma sira ne’ebé eziste iha Timor-Leste.
Enkuantu, Ministru Reforma Lejislativa no Asuntu Parlamentár, Fidelis Leite Magalhães, hato’o ninia kongratulasaun tanba hetan sertifikadu lisensa hosi asesu satelite palapa, nune’e públiku bele asesu iha teritóriu no nasaun seluk.
Governu nia papél save mak atu garante liberdade imprensa nomós respeita direitu ema nian.
Jornalista: Zezito Silva
Editora: Rita Almeida
