DILI, (TATOLI) – Ministra Negósiu Estranjeiru Austrália, Julie Bishop, hasoru malu ho Primeiru-Ministru, Taur Matan Ruak, iha Palásiu Governu, biban ne’e nia hateten sei nafatin suporta Timor-Leste (TL) ba dezenvolvimentu Greater Sunrise Joint Venture.
“Ami iha istória di’ak atu hato’o, hanesan atu suporta Timor-Leste hetan dalan atu dezenvolve Greater Sunrise ho parseiru Joint Venture”, tenik hafoin hasoru malu ho Xefe Governu, ohin.
Julie dehan tan hasoru malu ne’e hanesan onra boot ida atu espresa intensaun, ne’ebé atu hametin relasaun entre Austrália no Timor-Leste.
“Espésifikamente ami ko’alia kona-ba importansia tratadu Fronteira Marítima ne’ebé asina ona iha Nova Iorke iha fulan hirak liuba”, dehan tan.
Nune’e, ministra ne’e informa ba Xefe Governu hanoin ida ne’e hanesan presedente ida, ne’ebé nasaun rua ne’e bele halo prosesu konsiliasaun liuhosi konvensaun Nasoens Unidas kona-ba Direitu Tasi nian (CNUDM – A Convenção das Nações Unidas sobre o Direito do Mar) atu rezolve disputa fronteira.
Biban ne’e mós Bishop ho xefe governu ko’alia kona-ba programa seasonal worker ba timoroan.
“Ami mós ko’alia kona-ba seasonal worker programme, ne’ebé ami fornese ba traballadór timoroan hanesan oportunidade di’ak ba trabalhadór sira atu aproveita tempu iha Austrália no benefisia komunidade iha Timor-Leste bainhira sira fila”, karak.
Alende ne’e nia mos konvida Xefe Governu atu vizita Austrália. “Ida ne’e hanesan diskusaun pozitivu no ha’u konvida Primeiru-Ministru atu vizita Austrália”.
Jornalista: Julia Chatarina
Editora: Rita Almeida
