DILI, (TATOLI) – Sekretáriu Estadu Kooperativa, Arsénio Pereira da Silva, hatete sei halo agrupamentu ba grupu ki’ik sira ne’ebé la’o ketak-ketak atu halo sai grupu kooperativa ida hodi bele hamutuk halo produsaun barak.
Arsénio dehan iha grupu ki’ik barak mak eziste no iha grupu ne’ebé forma hanesan eventuál katak harii, tanba dalaruma hetan apoia ruma husi Governu, ajénsia ou organizasaun naun governamentál, mas depois ida ne’e hotu ida-idak la’o ninian no ladún iha kontinuasaun.
“Entaun grupu ki’ik sira hanesan ne’e iha ha’u-nia programa sei bá agrupa hotu kedan, se grupu ne’e peskadór mak eventuál oinsá para bele agrupa ida sai kooperativa peska no hanesan mós iha agrikultura sira prodús hare mean bele agrupa sai grupu kooperativa foos-mean”, katak nia iha Bebora, ohin.
Arsénio dehan tan haki’ak ikan bee-midar bele sai kooperativa ikan bee-midar. Ne’e agrupa para hatene ona, ezemplu Governu fó subsídiu ou aban-bainrua sira mós halo kréditu ba sira-nia kooperativa para halo produsaun boot liu ne’e iha ona estrutura kooperativa ne’ebé eziste para bele muda ida subsisténsia ne’e bá merkadu. Kuandu bá ona merkadu klaru muda ona ekonomia umakain.
Daudaun ne’e Timor-Leste nia produsaun agríkola barak liu mak uza ba han ka sei iha agrikultura subsisténsia ho objetivu produsaun garante sobrevivénsia agrikultór sira, família no komunidade.
Tanba ne’e ba grupu ki’ik sira ne’e Sekretáriu Estadu sei bá junta hamutuk no bainhira agrupa sei halo deklarasaun.
“Sira mak sei deklara ho kompromisu atu sai kooperativa. Ezemplu ida mak Aileu ho Maubise preparadu ona aban sira sei halo deklarasaun kooperativa depois hotu tiha mak foin mai rejistu. Ida ne’e mak sei halo para iha Timór laran tenke iha baze ekonomia metin liuliu umakain”.
Jornalista: Maria Auxiliadora
Editora: Rita Almeida
