DILI, (TATOLI) – Sekretáriu Jerál g7+, Helder da Costa, atualiza programa no atividade g7+ nian iha nivel globál ba Ministru Prezidénsia Konsellu Ministru, Agio Pereira.
“Em nome organizasaun intergovernamentál g7+ ne’ebé kompostu husi país 20, ami mai halo vizita kortezia ho señor Ministru Prezidénsia Konsellu Ministru iha Oitavu Governu Konstitusionál no ministru apresia no kontente tebes rona g7+ nia atividade nivel globál en termu halo advokasia kona-ba harii pás no harii Estadu”, Helder relata ohin, iha Palásiu Governu hafoin soru-mutu ne’e.
Sekretáriu Jerál ne’e dehan enkontru ho Ministru Agio Pereira tanba nia mak tutela g7+ nia programa iha governasaun daualuk nian. “Tanba ne’e mak ami mai hodi briefing señor ministru”.
Helder hatutan mós iha setembru tinan ne’e, sei iha enkontru altu nivel nian ida iha Nova Iorke ne’ebé mak sei konta mós ho prezensa líderansa husi Timor-Leste nomós país pós-konflitu sira seluk iha marjen durante reuniaun Asembleia Jerál Nasaun Unida iha fulan oin ne’e.
“Sierra Leone, Timor-Leste, Afganistaun, Portugál ho país sub-dezenvolvidu seluk mak sei organiza reuniaun ida nee”, katak.
Kona-ba lider Timor-Leste nian ne’ebé mak sei prezente iha enkontru g7+ sei konfirma, maibé Ministru Negósiu Estranjeiru no Kooperasaun, Dionísio Babo, sei partisipa tanba sai hanesan uma-na’in iha eventu ne’e hamutuk ho membru g7+ husi nasaun seluk.
“Koserteza karik Prezidente bá ka ita-nia maun boot keta bá karik ami sei buka konfirma lai, mas momentu ne’e ami-nia devér organiza eventu boot ida ne’e, tanba tinan-tinan hanesan prosesu abituál g7+ ho nia parseiru sira organiza eventu ida ne’e hodi ko’alia, halo avaliasaun kona-ba prosesu harii pás, harii Esatdu iha país pós-konflitu sira para ita sai lalais husi frajilidade”.
Jornalista: Maria Auxiliadora
Editora: Rita Almeida
