DILI, (TATOLI) – Sekretáriu Jerál g7+, Helder da Costa, hatete maski Timor-Leste iha inserteza polítika durante tinan ida resin, maibé ema admira ho situasaun rai-laran.
“Ema admira Timor-Leste tanba sá? Iha país pós-konflitu sira seluk karik funu ona, ne’e ema komesa kria ona violénsia, konflitu, mas iha Timor-Leste la’e, tanba sá? Primeiru, ami hatete ba sira iha buat rua mak Timor-Leste oferese, ita iha ita-nia metalidade reziliénsia, mentalidade timoroan ne’e maka’as tebes, ita kole ona ho konflitu. Segundu, ema bolu dehan instituisaun forte”, Helder afirma ohin, iha Palásiu Governu.
Helder akresenta instituisaun forte ne’e husi Prezidénsia, Governu, Parlamentu nomós intituisaun judisiária. “Tanba ne’e mak ha’u orgullu tebes haree Timór nia knaar ne’e, tanba ita ho país g7+ sira seluk sai pioneiru ba Objetivu númeru 16 (Pás, justisa no instituisaun forte) kona-ba ajenda 2030 ne’e”.
Sekretáriu Jerál ne’e esplika ajenda 2030 ko’alia kona-ba oinsá hametin instituisaun no Timor-Leste fasilita duni embora situasaun polítika inserteza, mas lider sira sei buka tuur hamutuk.
“Se la’e sei tuur hamutuk buka rezolve buat sira ne’e hotu hodi nune’e ita bele ultrapasa impase polítika ida ne’e no bele la’o bá oin tantu iha Governu, Prezidénsia, Palamentu no instituisaun ne’e iha interdependénsia ba malu, koopera malu hodi ita hala’o dezenvolvimentu ne’e ba ita-nia povu iha nivel nasionál nune’e hamorin Timor-Leste iha nivel internasionál”.
Jonalista: Maria Auxiliadora
Editora: Rita Almeida
