DILI, (TATOLI) – Ministru Interiór Interinu (MII) atúal Ministru Defeza, Filomeno Paixão, ohin hasoru malu ho superiór sira iha Polísia Nasionál Timor-Leste (PNTL) hodi diskute programa governu ba planu estratéjiku forsa inklui polísia.
ʺAmi ko’alia uitoan kona-ba programa governu da-ualu, planeamentu estratéjiku ba forsa, liuliu konstrusaun kapasidadeʺ, hateten governante ne’e iha Kuartel Jerál PNTL, Kaikoli.
Planu governu ba dezenvolvimentu forsa no polísia maka importante durante mandatu governasaun da-ualu.
ʺAmi durante ne’e, dezenvolvimentu forsa rua ne’e la hatama iha lei no laiha konsensu iha parlamentu, tanba ne’e bele muda, maibe tau iha lei ona tenke kumpre hodi implementaʺ, hatutan Paixão.
Nia akresenta durante ninia mandatu sei kria planu ba dezenvolvimentu instituisaun rua ne’e, mínimu tinan 10.
ʺPlanu dezenvolvimentu polísia ida aas nian tenke integradu ho F-FDTL, tanba lei seguransa nasionál hanorin planeamentu integradu, atuasaun integradu, komplementaridade”, esplika tenik.
Enkontru ne’e partisipa hosi Komisáriu Júlio Hornay, Komisáriu Faustino da Costa no Komandante munisípiu sira inklui Rejiaun Autonómu Espesial Oekusi-Ambenu.
Jornalista: Agapito dos Santos
Editora: Rita Almeida
