LIKISA, (TATOLI) – Fundadór Fundasaun Alola, Kirsty Sword Gusmão, hateten fó susu been kinur ba bebe hanesan fundu importante ba bebe nia moris.
“Hanesan inan tenke fó susu been kinur ho eskluzivu nu’udar fundu importante no asegura nutrisaun ba bebe nia moris”, afirma Kirsty ba jornalista sira bainhira komemora loron mundiál ba susu been inan ne’ebé realiza iha suku Lauhata, munisípiu Likisa, ohin.
Tanba ne’e inan sira tenke fó susu been kinur ba bebe durante fulan neen ho eskluzivamente, labele fó susu been kímiku enkuantu sira foin mak moris mai, tanba bele estraga bebe nia estómagu.
Parte seluk, Administradór munisípiu Likisa, Domingos da Conceição do Santos, apela ba inan no aman sira katak bebe sira ne’e mak jerasaun kontinuadór ba futuru nasaun nian, ka bebe sira forte nasaun mós sei sai forte liu tan.
Tanba ne’e, husu ba inan sira atu fó susu been kinur ba bebe atu bebe sira ho nutrisaun di’ak, atu ba futuru sira bele substitui jerasaun tuan sira agora.
Nia mós husu ba inan aman sira, responsavél ka autoridade hotu atu alerta nafatin ba komuniade hodi fó atensaun ba bebe nia moris ho nutrisaun ne’ebé di’ak.
Parte seluk, Michela Soares inan hosi bebe Crison Soares, konta durante grávida iha fulan sia nia laran sempre ba fasilidade saúde hodi hetan tratamentu no vitamina hosi pesoál saúde inklui akonsellamentu, nune’e bele saudavél ba bebe nia kresimentu.
“Ha’u foti desizaun hodi partu iha fasilidade saúde ne’ebé besik, atu ha’u bele hetan atendimentu ne’ebé di’ak hosi pesoál saúde sira no bele hetan partu seguru no moos”, katak.
Depois partu, nia konta fó kedan susu been kinur ba bebe to’o fulan tolu, hafoin ne’e, bainhira ba servisu, rai hela susu been kinur ba bebe to’o fulan neen mak foin introduz ho aihan komplementáriu tuir idade bebe nian.
Entretantu, Manajér Programa Saúde Inan, Maria Imaculada Guterres, dehan Ministériu Saúde deside ona Timor-Leste selebra loron mundiál iha agostu kona-na susu been inan.
Tanba ne’e, parte hotu tenke fó esklaresimentu ba inan isin rua ka oan sira ne’ebé mak simu ona vasina kona-ba importánsia fó susu been kinur ba bebe sira.
Jornalista: Zezito Silva
Editora: Rita Almeida
