DILI, (TATOLI) – Operasaun konjunta entre Alfándega no Polísia Militár (PM), kaer ona sidadaun Indonézia na’in-lima ne’ebé laiha dokumentu no halo importasaun ilegál iha área Atabae, munisípiu Bobonaru nian.
Diretór Jerál Autoridade Aduaneira (AA), José António Fátima Abílio, ba jornalista sira infoma ohin madrudaga pur volta tuku 3.00 ekipa ne’e apreende ró rua ne’ebé maka ida tula mina no seluk tula sasán motór nian, kompresór inklui sidadaun Indonézia na’in-lima ne’ebé maka laiha dokumentu.
“Agora ami prende ona iha área Atabae nian no lori mai ona, pur enkuantu tau hela iha Alfándega tuan (besik portu Dili), sira deskarrega no tau hela iha ne’ebá hodi hein inkéritu husi parte Alfándega nian”, haktuir eis edifísiu Ministériu Finansas, ohin.
Nia hatutan tan: “Bainhira ami halo hotu investigasaun, ami sei halo partipasaun ba Ministériu Públiku, tanba iha mós ligasaun ho sidadaun Indonézia na’in-lima ne’ebé tama ilegalmente. Loraik ne’e ami sei kompleta investigasaun depois mak prosesa”.
Tanba foin mak halo deskarregamentu, nune’e seidauk hatene kuantidade materiál ne’ebé transporta ilegalmente. Enkuantu tuir observasaun, kada masa hosi jerikén 20 ho mina lítru 20. Entre sidadaun na’in-lima ne’ebé kaer, iha labarik mane ida.
“Ita kaer ne’e momentu halo deskarregamentu iha tasi-ibun. Agora mina ne’e ró sei para hela mak ita-nia ekipa konjunta apoia sira ho ró bá maka kaer iha tasi-klaran mak lori sai mai iha li’ur, ne’ebé sasán sira ne’e lori mai hotu ona, inklui ró rua mós tula hotu mai hanesan evidénsia para lori prosesu ne’e bá oin”, katak.
Diretór Jerál ne’e subliña atu atividade ilegál ne’e labele akontese tenke buka kombate, tanba envolve ona sidadaun Indonézia ne’ebé maka lori mai ne’e haree katak iha ona rede ne’ebé forte entre Indonézia ho parte Timor-Leste nian.
“Kuandu iha ona network (rede) signifika Alfándega labele mesak ou labele hein operasaun konjunta ne’e mak rezolve. Operasaun konjunta ne’e hanesan meiu ida de’it, maibé instituisaun hotu ne’ebé maka iha responsabilidade halo knaar iha fronteira tenke hola pozisaun para prevene no tuir ida-idak nia funsaun, ita labele interven ida seluk nia, só iha kooperasaun ho intituisaun hotu ne’ebé iha fronteira mak foin bele kombate”.
Aleinde ne’e halo mós koordenasaun ho parte Indonézia, tanba sidadaun ne’ebé lamai ho dokumentu ida ne’e husi Alfándega (Bea Cukai) ou Polísia hatene ka lahatene.
“Ida ne’e mós ita tenke informa ba sira. tanba ne’e ha’u deside lori mai para informasaun ne’e ita bele hato’o ba KBRI (Kedutaan Besar Republik Indonesia-read) ou Minstériu Negósiu Estranjeiru para bá futuru haree antesipa oinsá, buka mekanizmu saida haree atividade ilegál liuliu kona-ba mina, merkadoria sira ne’e bele para”.
Tanba ne’e tenke hakotu rede ne’ebé daudaun ne’e importadór ilegál sira iha no iha rede ne’e la’ós envolve ida de’it, maibé parte rua hotu no liuhusi prosesu investigasaun maka sei deteta sé mak iha rede ne’e.
Dezde inísiu agostu ne’e iha operasaun konjunta ida ne’ebé maka lidera husi Alfándega ho apoiu Polísia Militár nian hodi bá halo patrullamentu ba importasaun ka atividade ilegál iha área tasi inklui mós fronteira.
Jornalista: Maria Auxiliadora
Editora: Rita Almeida
