DILI, (TATOLI) – Vise-Ministra Finansa, Sara Lobo Brites, hatete fulan-setembru laiha ona orsamentu duodésimu, tanba ne’e espera Prezidente Repúblika (PR) bele promulga Orsamentu Jerál Estadu 2018 ne’ebé daudaun debate hela iha Parlamentu Nasionál, nune’e bele utliza ona.
“Tuir kalendáriu debate espesialidade loron lima pur tantu orsamentu sei aprova finál globál ne’e iha dia 7 karik, depois presiza tempu loron tolu para halo alterasaun sira ne’ebé akontese iha espesialidade entaun pur volta iha dia 10 mak haruka ba Prezidente, ita espera Na’i Prezidente bele promulga iha fulan ne’e nia laran para iha ona orsamentu, tanba iha setembru nia laran ita laiha duodésimu, ita hein to’o orsamentu promulga”, Sara dehan iha Tibar, hafoin partisipa lansamentu ba konstrusaun projetu Parseria Públika Privada (PPP) Portu Tibar.
Ministra en ezersísiu ne’e hatete bainhira promulgasaun mak demora to’o fin fulan ne’e nian maka desizaun sei halo iha Konsellu Ministru relasiona ho utilizasaun osan iha setembru ne’e.
Hatán kona-ba kapasidade ezekusaun OJE 2018 ho montante billaun $1.279,6 iha fulan haat nia laran, Sara dehan sistema sira ne’e montadu hotu ona no importante mak aprova lalais para hahú kedan ezekuta iha setembru.
“Mas dada to’o fali outubru entaun ita hela de’it fulan tolu, entaun tempu ne’e maka limitadu, mas mákina sira ne’e montadu, sistema sira interligadu, agora pagamentu mós ita haree barak ne’e atu selu de’it ona, la’ós atu hein fali, saláriu mak ita tenke selu fulan-fulan, ba veteranu, mas restu ne’e medida sira ne’ebé Oitavu Governu aloka para selu, ita selu de’it ona pur tantu se ita haree katak pagamentu sira selu akontese husi entre setembru ou outubru, novembru no dezembru ita ezekuta de’it normál, laiha problema”.
Sobre envelope fiskál ne’ebé kada tinan taka iha 15 novembru, Sara dehan antes ne’e Governu deside taka iha loron ne’e tanba sistema uluk seidauk interligadu ho sistema banku nian, nune’e iha tinan ne’e espera halo mudansa uitoan ba oráriu ne’e para fó biban ba ministériu sira bele ezekuta sira-nia osan.
“Bele to’o iha meia do desembro tanba dezembru mos feriadu barak depois ami sei haree kalendáriu ne’e”.
Jornalista: Maria Auxiliadora
Editora: Rita Almeida
