DILI, (TATOLI)-Federasaun Xadrez Timor-Leste (FXTL) entrega sertifikadu apresiasaun ba jogadór xadrez juniór timoroan na’in rua.
Ema na’in rua ne’e mak hanesan; Sonizia Arteveti no Zezinho Moniz Tolentino V. Tilman, tanba reprezenta Timor-Leste (TL) hodi partisipa iha Asian Juniór and Girls Championship 2018, iha Ulan Bator, Mongolia, iha gabinete FXTL, Gedung Matahari Terbit (GMT)-Díli, ohin.
Sonizia (tinan 13) ho Zezinho (tinan 11), jogadór juniór xadrez reprezenta TL kompete ho partisipante na’in 62 husi nasaun 11 iha Ázia. Sira rua dezloka ba Mongolia akompañadu husi xefe delegasaun Mario Viegas hodi partisipa iha modalidade xadrez, ne’ebé hahú iha 17 agostu to’o 25 agostu.
Jogadora Sonizia Arteveti nu’udar estudante sestu ano husi Colégio São Miguel Arcanjo, Raicotu-Díli no Moniz Tolentino V. Tilman nu’udar estudante sestu ano eskola primária Ai-mutin-Díli.
Prezidente FXTL, Jeferino Viegas Tilman informa perante profisionál komunikasaun sosiál sira, husi imprensa, elektrónika nomós online katak jogadór na’in rua nia dezlokasaun hetan apoiu másimu no serbisu hamutuk, husi Federasaun Xadrez Mongolia (FXM).
“Bemvindo ba na’in tolu. Xefe delegasaun serbisu todan tebes, lori ki’ikoan na’in rua, ne’ebé nunka sai ba rai li’ur, liliu partisipa iha eventu sira hanesan ne’e. La fásil, nu’udar xefe delegasaun ho esforsu hothotu konsege lori sira to’o iha ne’ebá joga durante loron sia, 10 nia laran, lori sira fila fali mai hodi ita simu sira ho sertifikadu apresiasaun,” dezeju prezidente Jeferino Viegas Tilman.
Prezidente FXTL alende hato’o bemvindo, parabeniza mós inkluzivamente ba jogadór juniór Sonizia Arteveti no Zezinho Moniz Tolentino V. Tilman no xefe delegasaun tanba konsege ona hala’o kna’ar ho responsabilidade, ho di’ak tebes, ikus mai bele fila fali mai Timor ho rezultadu; karik la’ós sai kampiaun maibé sira ba joga ho dignidade. “La lakon hotu, la lakon ho aat,” nia subliña.
Iha kualidade nu’udar prezidente FXTL, nia manifesta mós nia sentimentu orgullu ba esforsu, dedikasaun atu joga; dader lorokra’ik, lorokra’ik dader, jogadór sira nian.
“Ida ne’e la fásil. Parabéns ba imi. Benvindo fila fali mai federasaun, mai nasaun doben Timor-Leste. Fiar katak imi na’in rua ba futuru sei sai jogadór ida ne’ebé mak di’ak liu, sei sai kampiaun iha eventu-eventu sira seluk,” kongratula Prezidente FXTL, Jeferino Viegas Tilman hodi agradese mós governu no estadu Mongolia nia apoiu.
Xefe delegasaun, Mario Tilman iha entevista ho jornalista sira informa katak nia hetan fiar husi FXTL hodi reprezenta federasaun ne’e no TL maibé sente todan tanba iha situasaun difisil. Maske nune’e konsege lori duni jogadór xadrez juniór na’in rua hodi partisipa iha eventu internasionál modalidade xadrez ne’e.
Nia informa mós katak prestasaun ne’ebé jogadór juniór, Sonizia Arteveti no Zezinho Moniz Tolentino V. Tilman hetan mak esperiénsia, abilidade, matenek no aprende liutan husi partisipante seluk kona-ba regra ne’ebé mak vigora mundialmente ba xadrez.
Nune’e iha loron ikus Asian Junior and Girls Championship 2018, Mongolia, iha Ulan Bator, Mongolia verifika katak jogadór rua hetan prestasaun di’ak, konsege hetan vitória hasoru jogadór ida, rua.
“Sira lakon maibé sira atentu tebes, duru tebes, hatene análize, tátiku, trik, halo nusa mak konvense. Ida ne’e mak ami sente orgullu ho jogadór na’in rua ne’e tanba sira pela primeravez partisipa iha jogu internasionál. Sira na’in rua nunka hakfodak ho jogadór sira ne’ebé idade boot liu,” nia haktuir.
Iha fatin hanesan, bainhira Ajénsia TATOLI tenta konfirma ho jogadora Sonizia Arteveti kona-ba nia sentimentu bainhira partisipa iha eventu internasionál ne’e, nia demostra katak kontente. “Ha’u kontente tanba hetan esperiénsia no aprende pasiénsia,” subliña jogadora Sonizia Arteveti.
Jornalista: Rafy Belo
Editór : Manuel Pinto
