DILI, (TATOLI)-Uma na’in ba eventu internasionál Asian Junior Chess and Girls Championship 2018, Mongolia, konsidera Timor-Leste (TL) nu’udar nasaun importante ida perante nasaun 11, reprezenta husi jogadór na’in 62 ho nia ekipa delegasaun sira.
Xefe delegasaun Timor-Leste ba kompetisaun jogu xadres juniór, Mario Tilman haktuir katak iha abertura ba eventu internasionál ne’e, vise-prezidente federasaun xadrez Mongolia nian, Ya. Sajmyatak, liuhusi nia diskursu, konsidera TL nu’udar partisipante espesiál.
“Ami sente orgullu tebes tanba nia espesifikamente dehan Timor-Leste hanesan partisipante importante liu entre sira hotu,” informa xefe delegasaun Mario Tilman, iha nia aprezentasaun relatóriu perante jornalista sira, ohin, iha GMT (Gedung Matahari Terbit), Díli.
Nia konta tuir katak hafoin abertura prezidente federasaun xadrez Mongolia nian, Ya. Sajmyatak bolu nia no hasai foto ofisiál hamutuk nomós ko’alia inklui lori hodi hasoru malu mós ho ema importante sira iha Mongolia; membru Parlamentu no governante mongolianu sira.
“Ida ne’e hanesan timoroan, ita sente onradu tebes ho apresiasaun, ho sira-nia atensaun másimu ne’ebé mak fó mai ita,” refere xefe delegasaun husi jogadór xadrez juniór, Sonizia Arteveti no Zezinho Moniz Tolentino V. Tilman, ne’e.
Nia konta tuir tan, abertura ne’e organiza mós husi Parlamentu Mongolia, TL konsege lori nia bandeira sa’e ba palku inklui nasaun partisipante seluk. TL reprezenta husi jogadora xadrez juniór Sonizia Arteveti.
“Iha abertura ne’e, vise-prezidente Parlamentu ao mesmo tempo vise-prezidente Federasaun Xadrez Mongoliano (Ya. Sajmyatak), iha nia diskursu, nia temi tan Timor-Leste dala ida iha palku, iha nia diskursu,” informa informa xefe delegasaun Mario Tilman.
Nune’e mós, tuir informa xefe delegasaun Mario Tilman, iha enseramentu ba eventu internasionál Asian Junior Chess and Girls Championship 2018, Mongolia, ne’ebé realiza iha 25 agostu, Vise-prezidente Federasaun Xadrez Mongolia, Ya. Sajmyatak, dala ida tan konvida reprezentante TL hasai foto ofisiál hamutuk ho nia, inklui partisipante husi nasaun seluk.
“Ha’u sente onra boot ne’ebé ita hetan. Ha’u labele espresa tan ho liafuan seluk, ha’u sente katak apoiu hotu, finansiamentu, la’ós totalmente, maibé Mongolia fó buat hotu ne’ebé ita merese atu hetan iha eventu ida ne’e,” louva Xefe delegasaun Timor-Leste ba kompetisaun jogu xadrez juniór iha Mongolia, Mario Tilman.
Entretantu, TL nia partisipasaun kona-ba modalidade jogu xadrez, iha ámbitu Asian Junior Chess and Girls Championship ne’e foin ba dahuluk.
Jornalista: Rafy Belo
Editór : Manuel Pinto
