DILI, (TATOLI) – Sekretáriu Estadu Kooperativa (SEK), Arsénio Pereira da Silva, hatete polítika SEK nian atu fó apoia ba grupu kooperativa liuhusi transferénsia públika, sei fó husi sentru sira no la’ós ba indivíduu.
“Subvensaun públika iha polítika agora ne’e lahanesan ida uluk, depois ita tau osan iha ne’ebá ema hotu halo proposta, ita lahatene nia mekanizamu, depois proposta mai ita aprova ne’e laiha. Mekanizmu ne’ebé agora ami halo ne’e tenke iha sentru, planu tenke mai husi ne’ebá”, Arsénio afirma iha Bebora, ohin.
Eis membru sosiedade sivíl ne’e haktuir apoiu ne’ebé uluk fó ne’e ba grupu sira, maibé agora ne’e ba kooperativa iha nivel sentrál.
“Entaun ita hatene katak sentru produsaun shorgum ne’e lapresiza fó osan, maibé iha ne’e halo prosesu aprovizionamentu sira presiza tratór, fini, treinamentu, ida ne’e mak ba diretamente, sei lafó osan ho diretamente”, katak tan.
“Balun ne’ebé bele hanesan peskadór sira ne’ebé la’o ona, mas seidauk tama iha kooperativa, se sira dehan ami seidauk tama, maibé ami halo atividade ida ne’e sei konsidera, maibé lasignifka hotu-hotu nia mekanizmu hanesan”.
Tanba ne’e aban-bainrua bainhira atu fó subvensaun públika sei ba iha sentru kooperativa sira no la’ós ba ida ne’ebé mai ho individualmente.
Jornalista: Maria Auxiliadora
Editora: Rita Almeida
