DILI, (TATOLI) – Reprezentante Fundu Nasoen Unida ba Labarik (UNICEF-sigla inglés) iha Timor-Leste, Valerie Taton, husu ba Parlamentu Nasionál hodi servisu hamutuk atu bele selebra loron mundiál ba labarik sira, espesialmente labarik sira iha Timor-Leste.
“Ami mai hasoru malu ho Prezidente Parlamentu atu hato’o planu UNICEF nian, oinsá mak atu komemora loron mundiál labarik sira nian iha Timor-Leste, nune’e ami husu kolaborasaun hosi Parlamentu Nasionál rasik”, dehan Valere Taton ba jornalista sira iha uma fukun hafoin sorumutu ho Prezidente PN, Arão Noé, ohin.
Nia haktui Prezidente PN prontu atu kolabora mezmu iha loron 20 novembru sei iha debate OJE 2019, maibé sei ko’alia ho komisaun F no G atu halo koordenasaun di’ak ho UNICEF atu bele halo preparasaun.
Alende ne’e mós UNICEF aprezenta situasaun labarik sira iha Timor-Leste, nune’e oinsá lejisladór sira bele haree lejislasaun direitu labarik sira nian iha nasaun ne’e.
Nia dehan ho prezensa UNICEF nian iha parlamentu, lider másimu orgaun lejislativa kontente tebes, nune’e ba oin bele kolabora di’ak liu tan hodi fó apoiu orsamentu ba selebrasaun loron mundiál labarik sira nian ne’ebé sei monu iha 20 novembru.
Nia afirma servisu hamutuk ne’e atu prevee orsamentu ba labarik.
Parte seluk, Prezidente PN hatutan selebrasaun ne’e parte UNICEF presiza halo kontaktu ho komisaun ne’ebé toma asuntu labarik.
“Ha’u fó informasaun ba UNICEF atu halo kontaktu ho komisaun F ne’ebé trata asuntu labarik nian, nune’e bele organiza hamutuk loron importante ba komemorasaun 20 novembru nian.
Jornalista: Zezito Silva
Editora: Rita Almeida
