DILI, (TATOLI) – Movimentu Kontra Okupasaun Tasi Timor (MKOTT) entrega ona asinatura mensajen solidariedade hamutuk 1.300 resin ba governu no Parlamentu Nasionál Austrália, liuhusi embaixada Austália iha Dili.
Asinatura 1.300 resin ne’e asina iha lona ka spanduk mutin ho metru 10. “Ami bele dehan reprezenta ona povu Timor-Leste nia solidariedade ba kompañeiru Bernard Collaery ho Witness K”, dehan portavóz MKOTT, Faustino Soares, liuhusi konferénsia imprensa, hafoin entrega asinatura solidariedade ne’e, iha Fatuhada, ohin.
“Mensajen solidariedade ne’e fó hanoin fali istória ne’eé ami-nia avó konta mai ami, ne’ebé deskreve povu Timor liu rihun neen nulu mak mate hodi defende sira-nia amigu kombatente tropa Australianu sira ne’e mak mate iha Segunda Guerra Mundial iha tinan 1942-1942”, lembra portavóz.
Tan ne’e, tuir Portavóz Faustino Soares, hanoin hikas eroi sira ne’ebé mate iha Segunda Guerra Mundial, MKOTT kondena maka’as akuzasaun hasoru Bernard Collaery ho Witness K, tan konsidera akuzasaun ne’e hanesan “moe boot” ida ne’ebé hatudu husi nasaun ne’ebé koñesidu promove liberdade espresaun nomós demokrasia.
“MKOTT sente triste ba nasaun boot hanesan Austrália ne’ebé kontinua han matak ba ninia viziñu sira. MKOTT haree liuhusi akuzasaun ida ne’e, governu Austrália iha planu atu halo ta’uk ema barak mak hakarak deskobre governu Austrália nia attitude ladi’ak hasoru ninia nasaun viziñu sira”, insiste.
Nia mós hodi MKOTT insiste ba Austrália atu hapara akuzasaun hasoru Advogadu Bernard Collaery ho nia kliente Witness K, tanba tuir MKOTT, loloos tribunál tenke salva guarda sasin sira no halo kondenasaun hasoru hahalok espionajen, la’ós kontráriu fali.
MKOTT apoiu maka’as inisiativa Andrew Wilkie MP, senadór Nick McKim, senadór Rex Patrick no senadór Tim Storer, membru Austrália nian, ne’ebé hakarak loke fali investigasaun ba iha kazu espionajen ne’ebé mak halo husi ASIO (Australian Security Intelligence Organisation) ka Organizasaun Intelejénsia Seguransa Austrália.
MKOTT hakarak propoen ba Prokuradór Jerál Federál Austrália nian atu loke investigasaun ba Eis-ministru Negósiu Estranjeiru, Alexander Downer ne’ebé mak agora dadaun ne’e tuur hanesan kuadru Konsellu Kompañia Woodside nian, ho razaun, tuir MKOTT, iha Alexander Downer nia mandatu hamutuk ho Eis-primeiru-ministru John Howard mak kazu espionajen akontese.
MKOTT sei nafatin mobiliza asinatura husi povu Timor-Leste hotu atu akontinua fó solidariedade ba Advogadu Bernard Collaery ho nia kliente Witness K-belun Timor-Leste, no sei aprezenta asinatura hirak ne’e iha loron julgamentu tuir mai iha loron 28 outubru 2018.
“Ami sei nafatin kontinua hodi fó suporta até tribunál hapara akuzasaun hasoru belun na’in rua ne’e”, kompromete.
Antes ne’e, Portavóz MKOTT ida mós, Juvinal Dias, hatete MKOTT planu sei ‘lobby’ Parlamentu Nasionál, orgaun ne’ebé aas liu reprezenta povu Timor-Leste hakarak atu halo asaun ruma hodi hato’o sentidu solidariedade povu Timor-Leste nian.
“Iha tempu badak, ita sei koko atu halo audénsia no husu Parlamentu atu halo reprezentasaun ne’e ho di’ak katak sira bele hakerek karta aberta ida ba Austrália hodi ezije, hato’o saida mak povu Timor-Leste sente kona-ba kriminalizasaun ba Bernard Collaery”.
Asinatura solidariedade ba Bernard Collaery no Witness K ne’e mós nu’udar kontinuasaun husi atividade ne’ebé MKOTT halo ona durante ne’e hasoru governu Austrália.
Partisipa iha entrega asinatura mensajen solidariedade hamutuk 1.300 resin ba embaixada Austrália iha Díli, alende MKOTT inklui mós sidadaun timoroan sira seluk; akadémiku no enjerál.
Jornalista: Rafy Belo
Editora: Rita Almeida
