Estudante DKS-UNTL Sei Kompete “Grande Finál” Produz Filme iha Jakarta

DÍLI, (TATOLI)-Neneik maibé bebeik, dala ida tan, estudante Departamentu Komunikasaun Sosiál (DKS), Fakuldade Siénsia Sosiál (FSS), Universidade Nasionál Timor Lorosa’e (UNTL) hatudu nia prestasaun akadémika.

Prestasaun ne’e hatudu husi estudante Nilton das Dores Pereira, basá bele sai vensedór ba produsaun filme badak ho tema Toleránsia Relijiaun, iha nível nasionál no ohin sei ba kompete tan, Grande Finál iha Jakarta.

“Ha’u sente kontente ho rezultadu ne’e. La’ós kontente de’it, maibé valór pozitivu ne’ebé ha’u foti husi rezultadu mak inspirasaun no motivasaun mai ha’u, atu bele kontinua aprende liutan iha área filme ninia, liliu filme dokumentáriu,” hateten vensedór ho naran estimadu Nilton, ba Ajénsia TATOLI, via facebook, ohin.

Estudante finalista DKS ne’e haktuir katak nia intensaun durante iha nia prosesu estudu la’ós atu ba halo kompetisaun hodi buka manan ka lakon maibé importante mak oinsa bele aprende no kontinua aprende di’ak liutan hodi esplora kualidade pesoál, buka deskobre talentu no kapasidade teóriku no tékniku sira ne’ebé mak iha.

“Kompetisaun ne’e sai hanesan sasukat kapasidade ida mai ha’u-nia kapasidade iha área filme dokumentáriu,” hateten vensedór ba kompetisaun ho tópiku: 365 Stories Digital: Story Telling Network Competition 2018, organiza husi Uma Amérika, iha Díli, Nilton das Dores Pereira.

Nia haktuir katak, maske ho limitasaun iha prosesu produsaun filme badak ne’e maibé bele hetan esperiénsia lubuk ida tanba konsege aplika téoria kona-ba área komunikasaun sosiál nian ba iha prátika no hatudu rezultadu inklui hetan apresiasaun di’ak husi públiku.

“Ita halo filme dokumentáriu tenke pasiénsia,” subliña estudante UNTL, Nilton Pereira, ne’ebé moris iha Same-Maunfahe, loron 3 setembru 1993 ho fitun eh zodiaku Virgo, ne’ebé iha preferénsia ka hobby fotografia no filmajen ne’e.

Fuan domin Arlindo Pereira (Agrikultór) no Virgilia da Costa Baptista (Profesora) husi uma lisan Uma Lia Na’in ho Uma Lor no Uma Hataru no Uma Korik ne’e haktuir nia kronolojia estudu katak nia tama UNTL, liu departamentu Komunikasaun Sosiál iha 2013.

Antes ne’e, sekundáriu iha Colégio São Jose Balide, Díli (2009), Pré-sekundária iha Eskola Katólika Miguel Arcanjo Same (2005), Primária Katólika Miguel Arcanjo Same (1999) no Infantil mós iha São Miguel Arcanjo Same (1999).

Alin husi Miguel Arcanjo “Migy” (matebian) no maun husi Jesuinha Baptista Pereira (Noi), Ambrosio Pereira (Ajiu), Cesarinho Baptista Pereira-Aja (matebian), Celajinho da Conceição Baptista Pereira “Cesar” (matebian) ne’e mós haktuir, iha perkursu edukasaun ne’e no vida hasoru mós “laloran moris” maske nune’e ho pasiénsia korajen no metin iha fé, hodi hasoru laloran ne’e basá iha universidade hela dook husi inan-aman, tan inan-aman iha foho.

Katak, susesu iha ita-nia estudu mak primeiru tenke mai husi ita-nia hakarak rasik no sentimentu domin nomós komprometidu iha ba área ne’e, labele haksoit ba haksoit. Nune’e mós tenke iha vontade, badinas buka aprende, labele hein de’it husi dosente sira.

“Buka rasik! Agora dadaun ne’e mundu dijitál; iha internet buat hotu iha, depende ita uza. Aproveita buat sira ne’e hodi eleva ita-nia kapasidade iha área ne’ebé mak ita foti,” estudante DKS ho karakteristika isin-mutin morena ho estilu preferénsia ala kribo ne’e fó hanoin.

Nune’e tuir nia, ho inspirasaun ida ne’e, motiva no inspira nia hodi tuir kompetisaun ne’e. Ho kronolojia katak kompetisaun ne’e hahú uluk ho workshop, maske nune’e molok tuir konkore uluk liuhusi pergunta lubuk ida; fó husi Uma Amérika iha UNTL.

Iha konkorénsia ne’e, iha konkorente na’in 16, depois avizu rezultadu nível nasionál, Nilton Pereira, eskollidu nu’udar vensedór nasionál no ohin reprezenta Timor-Leste sei ba konkore tan iha Jakarta-Indonézia.

Iha fatin ketak, ba Ajénsia TATOLI, Xefe Departamentu Komunikasaun Sosiál-UNTL, Dominica Dwikory Sitaresmi hateten katak nia orgullu no agradese tebes esforsu estudante Nilton das Dores Pereira, apoiu profesór Francisco Ismenio no dosente DKS sira hotu nia dedikasaun.

“Ida ne’e fó motivasaun di’ak ba estudante seluk atu estuda di’ak liutan,” konsidera xefe departamentu Dominica Dwikory Sitaresmi perante jornalista sira, iha kampus UNTL, Caicoli-Díli, tersa (19/09).

Nia esplika katak área komunikasaun sosiál ne’e luan no barak loos, tan ne’e importante tebes la’ós  de’it iha produsaun filme, maibé importante mós iha hakerek. Bainhira hakerek di’ak filme sei di’ak.“Prinsipál ne’e hakerek uluk lai. Kuandu hakerek di’ak, ba ne’ebé de’it fásil,” konklui akadémiku universidade públika, UNTL.

Entretantu, produtu KS ne’ebé hetan “vitória” ka vensedór eh manan na’in hodi hatudu prestasaun akadémika iha eventu nasionál sira, organiza husi entidade sira seluk envolve estudante KS sira ne’ebé departamentu apresia liuhusi atividade amizade (bina-akrab), mak manan na’in kompetisaun filmajen badak, iha PHD-Austrália, 2017 primeiru lugar mak estudante Ludovino dos Santos.

Segundu lugar, estudante Hermenegildo Maia Oliveira no terseiru lugar mak estudante Bernardo Corte Real.

Tuir mai, manan na’in ba kompetisaun kona-ba filmajen badak: lokutór rádiu no filme badak TLMDC (Timor Leste Media Development Center)-Rádiu Rakambia DCS-SEKOMS (Sekretáriu Estadu Komunikasaun Sosiál), 2016, mak estudante Candido Alves, terseiru lugar. Nune’e mós ba estudante Dilijanto F. Viana Xavier, segundu lugar.

Inklui, manan na’in ba kompetisaun fotografia kona-ba: “Human Behind the Camera” TelKomcel, 2017 mak estudante Iriana Domina Soares, terseiru lugar.

Manan na’in ba kompetisaun fotografia (ONU-Organizasaun Nasaun Unida): “Juventude no Objetivu Dezenvolvimentu Sustentável” 2015 mak estudante Eugenio Pereira da Silva.

Manan na’in ba kompetisaun fotografia: “Dili Photographer Comunity” mak estudante Verónica de Oliveira Ximenes.

Prestasaun ne’ebé estudante sira atinji hodi reprezenta departamentu Komunikasaun Sosiál hodi hatudu ba públiku kona-ba kualidade estudante komunikasaun, UNTL (Universidade Nasionál Timor Lorosa’e) nian ne’e nu’udar motivasaun no korajen ba estudante sira seluk no iha futuru.

“Ne’e hanesan motivasaun ba estudante sira seluk iha futuru, atu bele hetan mós rezultadu sira hanesan ne’e,” dehan diretora departamentu KS, Dwikori Sitaresmi hodi enkoraja estudante sira, bainhira komemora estudante KS sira-nia susesu, foin lalais ne’e.

 Jornalista: Rafy Belo

Editór : Manuel Pinto