DILI, (TATOLI) – Prezidente Repúblika, Francisco Guterres Lú Olo, kinta ne’e, iha Palásiu Prezidente Nicolau Lobato, Bairru Pité, deklara promulga Orsamentu Jerál Estadu (OJE) 2018 ho montante biliaun $1.277,4 no propoin ba Governu atu ezekuta ho rigór.
Xefe Estadu hateten promulgasaun OJE refere akontese ho razaun ekonomia nasionál atravesa hela faze ida difisil no atu hakotu aplikasaun rejime duodesimál ne’ebé mai hosi OJE tinan kotuk, ho ninia karáter temporáriu no exesionál.
Razaun seluk, Lú Olo dehan bazea ba análize hatudu laiha fundamentu ruma atu halo pedidu fiskalizasaun preventiva konstitusionalidade no legalidade.
Alende ne’e OJE 2018 ho objetivu selu empreza sira, nune’e bele kria tan kampu serbisu ka bele hetan dezempeñu ekonómiku maka’as liu-tan iha nivel rai laran no OJE ida ne’e mós atu fasilita Estadu tama iha ezekusaun orsamentu normál, nune’e Estadu bele kumpri ninia obrigasaun prioritária sira, liu-liu obrigasaun sira liga ba grupu sidadaun vulnerável sira, veteranu, Bolsa da Mãe, rezolve tusan ospitál sira iha rai liur, selu tusan mina ba jeradór sira.
Tuir nia maski promulga maibé OJE 2018 sei hasoru dezafiu oi-oin, tanba kapasidade ki’ik atu ezekuta OJE no tempu ezekusaun ne’ebé limitadu tebes (tempu efetivu fulan tolu de’it), tan ne’e, husu Governu atu hatudu rigór iha ezekusaun despeza públika.
Nia hatutan Konstituisaun artigu 85 aliña 1 no 3 konjugadu ho artigu 88 aliñea 1 temi katak iha prazu loron loron 30, hahú hosi loron simu diploma OJE, Prezidente Repúblika promulga ka uza direitu veto kona-ba diploma lejizlativu no maski sei falta semana rua atu prazu ramata tuir konstituisaun haruka, xefe estadu promulga ona.
Nia apela ba ema hotu atu lalika uza argumentasaun ne’ebé buka ignora ka distorsa realidade ne’e.
Jornalista: Xisto Freitas
Editora: Rita Almeida
