DÍLI, (TATOLI)-Sekretáriu Estadu Arte no Kultura (SEAK) manifesta interese hodi serbisu hamutuk ho Portugal no Uniaun Europeia (UE) hodi promove no prezerva patrimóniu kulturál, liuhusi nia diskursu iha Ministériu Negósiu Estranjeiru no Kooperasaun (MNEK), Praia dos Coqueiros-Díli, iha segunda kalan (01/09), iha ámbitu ba komemorasaun Tinan Europeu ba Patrimóniu Kulturál.
“Ha’u manifesta interese boot no disponibilidade Sekretáriu Estadu Arte no Kultura, hodi ita serbisu hamutuk iha promosaun no prezervasaun patrimóniu kulturál hodi kontribui ba nasaun ida, Timor-Leste ida prósperu no riku liu iha nível kultura no artístiku,” dehan sekretáriu estadu, Teofilo Caldas, hodi reprezenta governu Timor-Leste da-walu, lideradu hus Primeiru-ministru, Taur Matan Ruak.
Tanba ne’e, SEAK insiste ba Portugal no UE liuhusi nia embaixada no reprezentasaun iha Timor-Leste atu kontinua atividade idéntika sira seluk iha tempu sira tuir mai.
“Ha’u hakarak lansa dezafiu ba embaixada Portugal iha Díli no Uniaun Europeia atu bele repete tan inisiátiva hanesan iha Timor-Leste,” dezafia sekretáriu estadu Teofilo Caldas perante públiku.
Iha fatin hanesan, Xefe Delegasaun UE iha Timor-Leste, Alexandre Leitão akresenta katak Timor-Leste hanesan nasaun joven buka konsolida nia identidade; turizmu mós nu’udar efeitu importante. Tanba ne’e Timor-Leste mós tenke valoriza patrimóniu kulturál ne’ebé mak iha; tantu património materiál nomós imateriál.
Enkuantu embaixadór Portugal ba Timor-Leste, José Pedro Machado Viera hateten, Portugal ho Timor-Leste iha ligasaun amizade, ho promove no prezerva patrimóniu kultura; múzika no dansa, nu’udar mós plataforma dialógu ida.
Entretantu, Komemorasaun Tinan Europeu ba Patrimóniu Kulturál iha Timor-Leste hahú iha 25 Setembru no termina horesik, ho intervensaun atividade oioin hanesan semináriu, aprezentasaun múzika no dansa tradisionál Europa no Timor-Leste nian.
Eventu internasionál ne’e hala’o ho inisiativa husi embaixada Portugal iha Timor-Leste, Institutu Camões ho apoiu husi Fundação Oriente, Universidade Nasionál Timor Lorosa’e (UNTL) no Europe For Culture no seluk tan no finansia husi Uniaun Europeia.
Aprezentasaun múzika no dansa tradisionál sira mak husi UNTL, estudante São Pedro Comoro, Grupu Leziaval, Grupu Santo António no grupu dansa tradisionál sira seluk tan.
Jornalista: Rafy Belo
Editór : Manuel Pinto
