DÍLI, (TATOLI)-Fakuldade Medisina, Siénsia no Saúde (FMSS), Universidade Nasionál Timor Lorosa’e (UNTL) liuhusi Asosiasaun Akadémika Estudantil (AAE), realiza FMSS CUP, ho intensaun atu hametin espiritu nasionalizmu foinsa’e sira nian liuhusi kompetisaun entre departamentu ho modalidade hanesan futsal, basketball no volleyball ba feto no mane.
Objetivu husi eventu ne’e mak atu promove espiritu nasionalizmu no sentidu pertense estudante sira nian, orgullu nu’udar timoroan liuhusi komemorasaun 12 Novembru 1991 nu’udar loron istóriku ba juventude tomak.
Promove fíziku ida ne’ebé saudável, kakutak ne’ebé matenek no neon badinas hodi kontribui ba dezenvolvimentu nasionál no dezenvolve amizade ne’ebé forte hodi kontribui ba estabilidade nasionál.
Dekanu FMSS, João Martins iha abertura ba jogu ne’e hateten katak nia orgullu tebes ho senadu AAE-FMSS tanba halo kontaktu ho organizasaun rezisténsia sira tanba liuhusi meiu ne’e, rezistente sira bele konta sira-nia istória kona-ba saida de’it mak sira halo bainhira sei joven hodi kontra okupasaun.
Dekanu João Martins konsidera katak momentu ne’ebá joven rezisténsia sira halai tuun sa’e, subar husi fatin ida ba fatin ida tanba INTEL sira buka atu bele kaer sira, maibé joven ka estudante sira agora la halo hanesan ne’e tan. Joven sira agora moris iha tempu ne’ebé livre, iha oportunidade barak mak atu estuda didi’ak.
“Imi halo atividade sira ne’ebé iha valór ba ita-boot sira rasik, ba ita-boot sira-nia komunidade. Ida ne’e mak importante, parte ida mak eskola, parte ida mak atividade ekstrakurikulár; di’ak tebes ba formasaun karaktér ita-boot sira nian,” dehan dekanu João Martins ba estudante FMSS, iha SEJD (Sekretáriu Estadu Juventude no Desportu), Lecidere-Díli, iha sábadu (06/10) ne’e.
Dekanu FMSS, João Martins haklaken, estudante FMSS aban bainrua sei sai profisionál saúde, sei hetan kolokasaun ba iha suku sira. Nune’e se kontinua atividade desportu iha fatin ne’ebé serbisu ba, sei halo alin no joven sira, nia moris sei saudável tebes; sira sei sai futuru ida di’ak ba nasaun ne’e, tanba graduadu FMSS sei lori esperiénsia sira hanesan ne’e ba fahe iha suku suku sira mós.
Di’ak liutan, komunidade sira iha suku bele moris saudável, kuandu sira halo serbisu sira bele envolve aan iha atividade desportu, atividade kultura. Ne’e furak tebes.
FMSS la’ós hala’o de’it misaun desportu, maibé misaun saúde nian mós. Ita hakarak ema nia saúde di’ak ba bebeik nomós halo prevensaun tanba halo ezersísiu sira ne’e; importante ba prevensaun doensa naun-kontajioza-moras sira ne’ebé la hada’et, ne’ebé mak ita komesa enfrenta krize boot ida, ema fa’an buat midar sira barak, aban bainrua sei ku’u fuan la di’ak ba ita-nia sosiedade, la di’ak ba ita-nia joventude sira.
“Se ita-boot sira konsege serbisu ida ne’e, di’ak ba ita-nia komunidade, di’ak mós ba imi-nia aan, promove mós katak graduadu UNTL nian, la’ós de’it mai serbisu maibé sira mós envolve aan oinsá atu bele halo komunidade ne’e mais vivo (moris liutan),” konsidera akadémiku UNTL ne’e.
Dekanu João Martins mós agradese senadu ba inisiativa ida di’ak tebes, espera katak sei kontinua nafatin. Nune’e mós husu atu aban bainrua, senadu ida ne’ebé mai foun ne’e, sei kontinua ideia, inspirasaun, atividade sira ne’ebé di’ak no inovativu sira ne’e; tenke kontinua nafatin tanba parte ida atu promove UNTL nomós fakuldade ba sosiedade iha Timor-Leste.
Inklui, fó sujestaun katak karik bele, ba oin, senadu AAE-FMSS liga mós organizasaun rezisténsia seluk tanba alende Komite 12 Novembru, iha mós OJETIL (Organização Juventude de Timor-Leste), RENETIL (Resistência Nacional dos Estudantes de Timor-Leste), FITUN no seluk tan; konvida mós sira mai fahe esperiénsia.
“Agredese ba serbisu di’ak senadu nian, ne’ebé sempre halo atividade kontinua nafatin no agradese mós ba vise-dekana, mezmu feto maibé espiritu no domin ba imi boot tebes,” agradese dekanu João Martins perante estudante sira.
Iha fatin hanesan, reprezentante Komite 12 Novembru, Manuel Maia, iha abertura jogu hateten, liuhusi desportu bele valoriza ona eroi sira, liuhusi atividade sira ne’e fó onra ba sira, liliu selebra 12 Novembru liuhusi atividade ida ne’e.
“Komite 12 Novembru prontu nafatin suporta alin sira, jerasaun foun sira, joven sira para bele hamutuk ho Komite 12 Novembru para ita bele kontribui ba dezenvolvimentu nasionál, liuhusi buat barak; desportu, siénsia,” garante reprezentante Komite 12 Novembru ne’e.
Nia mós husu ba joven no estudante FMSS sira katak prepara aan tanba ita agora iha kompetisaun barak la halimar; para forma ema ida, ita presiza moris iha disiplina, hadomi malu nu’udar timoroan hodi espiritu patriotizmu no nasionalizmu ne’e boot iha ita-nia fuan hodi hadomi ita-nia rain ida ne’e
Tanba sakrifísiu barak ona ita-nia éroi sira luta hodi entrega sira-nia vida, ohin loron ita bele hamriik nu’udar estadu ida. Atu valoriza loron boot, atu valoriza eroi sira ne’e, iha meius barak jerasaun foun sira bele halo.
“Imi nu’udar estudante saida mak bele halo? Prepara imi-nia aan, kapasita imi-nia aan para bele kontribui ba dezenvolvimentu nasionál iha rai ida ne’ebé ita hadomi. Desportu ne’e atu halo amizade entre imi, atu kuda domin iha imi-nia leet, atu hadomi malu nu’udar timoroan. Imi hadomi desportu, imi bele hadook violénsia iha ita-nia rain,” dehan reprezentante Komite 12 Novembru ne’e.
Nia akresenta, liuhusi desportu kria amizade entre ita nu’udar timoroan. Uluk ita timoroan la inimigu ba malu, timoroan nia inimigu mak kolonializmu de’it iha altura ne’ebá. “Ami hamutuk ida de’it, unidade nasionál,” friza sobrevivente 12 Novembru, Manuel Maia.
“Atu hatutan, atu hadomi malu nu’udar timoroan, mai ita hamutuk kaer liman ba malu. Husu ba alin sira, mai ita hamutuk ita hotu kontribui fó onra ba ita-nia maluk eroi sira-nia vida hodi troka rai ida ne’e. Ami-nia mate mak imi-nia moris. Ami-nia sakrifísiu mak ita-nia indepedénsia,” nia fó hanoin hodi reforsa.
Iha biban ne’e, Xefe AAE-FMSS, Adão do Carmo de Jesus, iha nia diskursu akresenta katak objetivu husi eventu ne’e alende kria amizade entre departamentu sira iha fakuldade hodi promove komunikasaun di’ak, atu halo mós selesaun ba jogadór sira, husi ekipa independente ida, atu reprezenta fakuldade ba iha eventu sira ne’ebé mak kria iha li’ur.
“Joga halo didi’ak! Prémiu, taxa sira ne’e formalitas (formalidade-red), importante mak ita-nia disiplina,” xefe Adão do Carmo fó hanoin ba jogadór sira husi departamentu Enfermajen, Medisina Jerál, Farmásia, Parteira, Nutrisaun no Diatétika inklui alumni FMSS.
Tanba, tuir nia, estudante FMSS halo jogu ka joga iha fatin públiku, nune’e presiza disiplina, atu nune’e hatudu ba públiku, atu lori fakuldade, universidade nia naran ne’ebé mak di’ak iha no perante públiku.
Nune’e, husu ba jogadór FMSS sira atu partisipa jogu ho didi’ak, kumpre ba regra ne’ebé komisaun hasai atu nune’e jogu bele la’o ho di’ak no lori susesu.
“Susesu ne’ebé ita iha, sei kontribui ba ita-nia fakuldade, universidade, sosiedade no ba nasaun Timor-Leste,” konklui xefe senadu AAE-FMSS, Adão do Carmo de Jesus.
Entretantu FMSS CUP realiza tanba patrosíniu husi empreza Star Printing, Coronel Unipessoal Lda no Timor Telecom.
Notísia relevante; http://www.tatoli.tl/2017/09/valoriza-masakre-12-novembru-ho-torneiu/
http://www.tatoli.tl/2017/12/joven-sira-agora-presiza-kuda-espiritu-nasionalizmu/
http://www.tatoli.tl/2017/11/fmss-sei-refleta-12-novembru-ho-sasin-moris-masakre/
Jornalista: Rafy Belo
Editór : Manuel Pinto
