DILI, (TATOLI) – Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, deklara kontinua prontu serbí Estadu liuhusi instituisaun F-FDTL bainhira Xefe Estadu, Francisco Guterres Lú Olo, prolonga ninia mandatu to’o tinan oin.
“Ha’u prontu kualker momentu atu serbí Estadu, bainhira ha’u nia saúde sei permite. Ohin loron ne’e ha’u nia saúde sei permiti hela”, Lere ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin enkontru ho Prezidente Repúblika hodi ko’alia kona-ba difikuldade ne’ebé F-FDTL hasoru.
Nia katak kuandu sente dehan labele ona, nia sei foti liman rasik hodi entrega pozisaun ne’e ba kuadru superiór sira seluk iha F-FDTL atu asume.
“Ha’u nia pozisaun ne’e entrega ba Prezidente Repúblika atu deside, purke nia (Prezidente) maka orgaun másimu Estadu nian entaun buat hotu-hotu liuhusi Xefe Estadu nu’udar Komandante Supremu F-FDTL”, Lere afirma.
To’o oras ne’e, Prezidente Repúblika seidauk fó sai loron nomeasaun ba Xefe Estadu Maior Jenerál nomós Xefe Estadu Maior, tanba sei estuda hela proposta hosi Governu.
Majór Jenerál Lere asume mandatu lidera F-FDTL durante tinan haat, hahú hosi 2015 liu-ba to’o 2019 no kada tinan iha tinan haat nia laran ne’e prolonga ka la’e depende ba proposta hosi Governu no depende mós ba desizaun Prezidente Repúblika atu estende ka la’e.
Iha biban ne’e, Majór Jenerál, Lere Anan Timur, hamutuk ho Vise Xefe Estadu Maior Jenerál, Falur Rate Laek no Xefe Estadu Maior, Koronél Koliati, levanta difikuldade ne’ebé F-FDTL hasoru ba PR.
Tuir Lere oras ne’e F-FDTL hasoru difikuldade kona-ba kombustível, maske orsamentu jerál Estadu aprovadu ona, maibé nia konsidera ne’e la’ós problema boot ida ba sira.
Jornalista: Xisto Freitas
Editora: Rita Almeida
