DÍLI, (TATOLI)-Valoriza no dignifika ita emar ho asaun umanitária; lolo liman ba malu hodi hamaran oan ki’ak nia matabeen, sai tópiku esensiál iha primeiru kongresu organizasaun voluntáriu naun-lukrutivu, Fórum Karidade Humanitarian Timor-Leste (FKHTL), hodi habelar misaun umanitária, solidariza no apoiu vulnerável sira; faluk no oan ki’ak sira.
Prezidente Komisaun Organizadora, Beni Gonçalves informa katak tópiku ne’e refleta ba vizaun no misaun FKHTL nian. Katak, labarik no komunidade vulnerável moris di’ak, kontente, seguru hodi asesu no goza ba sira-nia direitu moris nu’udar umanu.
No, promove espiritu solidariedade, umanizmu, igualidade no dignifika ema vulnerável iha Timor-Leste. Inklui, hakbiit labarik no komunidade vulnerável Timor-Leste hodi bele partisipa iha dezenvolvimentu nasionál Timor-Leste nian.
Enkuantu objetivu FKHTL mak garante dezenvolvimentu ne’ebé mak bele fó benefísiu ba povu ho partisipasaun ativa, garante prátika dezenvolvimentu ne’ebé responde ba nesesidade povu liuhusi transparánsia no akuntabilidade iha dezenvolvimentu nasionál.
“Liuhusi programa sira ne’ebé eziste iha fórum karidade nia laran, hanesan; tuun diretamente iha terenu, halo peskiza, foti dadus kona-ba faluk no oan ki’ak sira ne’ebé mak halerik hela ba ita hotu nia tulun, ita tau hamutuk sentavu lima, 10 no ka kuarter (sentavu 25) hodi bele tulun sira,” informa Prezidente Beni Gonçalves ba Ajénsia TATOLI, iha salaun Kampus Universidade Oriental Timor Lorosa’e (UNITAL), Becora-Díli, iha fim-de-semana ne’e.
Durante ezisténsia FKHTL kuaze iha tinan rua nia laran, konsege apoia no tulun ona kbiit laek, faluk oan ki’ak sira, kuaze maioria iha sidade Díli, hodi hakmaan susar no terus ne’ebé vulnerável sira ne’e iha, tuir kbiit joven no estudante voluntáriu sira ne’e nian.
“Tanba ita iha esperansa boot tebes, ba oin atu garante liután, ita-nia fórum ne’e bele hala’o nia misaun atu hale’u hotu Timor laran ne’e, hodi responde ba faluk no oan ki’ak iha Timor laran, ita mós iha mehi ida katak ita sei hakarak kontinua tan ho programa hirak ne’ebé mak ita sei diskute fali iha ita-nia fórum ne’e nia laran,” haklaken Prezidente Komisaun Organizadora, Beni Gonçalves.
Nia informa katak kongresu ne’ebé FKHTL hala’o loron rua, hahú husi sesta to’o sábadu (27/10/2018) ne’e, kongresista sira; feto no mane ho klase idade ne’ebé diferente, mai husi joven no estudante voluntáriu sira, husi ensinu sira iha Timor-Leste laran, liliu kapitál Díli.
Prezidente Komisaun Organizadora, Beni Gonçalves esplika ba Ajénsia TATOLI kona-ba razaun sira kria FKHTL ne’e katak nia la kumprende tanbasá membru ba organizasaun naun-profit ne’e bele entuziasmu sai voluntáriu, mezmu mesak estudante no moris barak sei dependente ba inan-aman.
Maibé, tuir nia, karik eskolla natureza ida, hodi inspira foinsa’e voluntáriu sira ne’e hodi iha espiritu solidariedade ba ema vulnerável sira; faluk no oan ki’ak sira.
“Ida, karik ne’e natureza. Segundu, inan faluk no alin oan ki’ak sira mak durante ne’e tanis hela, halerik, sira-nia matabeen ne’e mak natureza manifesta tama iha ami-nia isin-lolon atu sai hanesan instrumentu ida atu bele responde ba sira-nia tanis halerik,” esplika prezidente Beni Gonçalves.
Entretantu, primeiru kongresu organizasaun naun-lukrutivu, FKHTL ne’e, diskute, elabora no halo revizaun ba sira-nia estatutu no define sira-nia organigrama hodi bele halo espansaun tan ba sira-nia atividade, tuir vizaun, misaun no objetivu organizasaun ne’e nian.
Jornalista: Rafy Belo
Editór : Manuel Pinto
