DÍLI, (TATOLI)-Reitór Universidade Nasionál Timor Lorosa’e (UNTL), Francisco Miguel Martins konsidera asaun Movimentu Universitáriu Timor-Leste (MUTL) ne’e tanba liberdade expresaun, ne’ebé garante mós iha ita-nia konstituisaun.
Konstituisaun Repúblika Demokrátika Timor-Leste (KRDTL), artigu 40o (Liberdade ko’alia no informasaun nian).
“Ita-nia konstituisaun ne’e prevé ema hothotu atu expresa livre. Ita-nia konstituisaun la bandu ema, ita-nia sidadaun atu expresa ninia hanoin,” dehan Reitór Francisco Miguel Martins ba jornalista sira, iha salaun INFORDEPE, Balide-Díli, ohin.
Reitór UNTL ne’e akresenta katak MUTL ne’e la’ós UNTL mak organiza maibé kombinasaun estudante sira husi universidade sira hotu inklui joven sira balun. “MUTL ne’e mós sidadaun. Expresaun sidadaun, ne’e ba polítiku sira oinsa bele solusiona saida mak sira hakarak,” akresenta reitór ensinu superiór públiku ne’e.
Akadémiku ne’e salienta katak la iha kbiit atu bandu MUTL. “Lei saida mak atu bandu? Reitór la iha kbiit. Tanba ida ne’e mak ita-nia konstituisaun garante liberdade ba ema hotu. Reitór la iha kbiit atu bandu, la iha kbiit atu hapara”.
Nune’e, Reitór Francisco Miguel Martins reforsa tan katak MUTL ne’e la’ós UNTL maibé jerál. “Ne’ebé ha’u la dehan, konstitusionál ka inkonstitusionál, maibé tuir ha’u-nia haree, ita-nia konstituisaun garante atu expresa livre, ba sidadaun hothotu,” konklui reitór.
Entretantu, asaun MUTL ne’e, husu ba Parlamentu Nasionál atu hapara sosa kareta ho marka Prado ba deputadu sira nomós ezije eis-deputadu sira ne’ebé seidauk entrega fali Prado atu entrega hikas.
Jornalista: Rafy Belo
Editór : Manuel Pinto
