DÍLI, (TATOLI)-Reitór Universidade Nasionál Timor Lorosa’e (UNTL), Francisco Miguel Martins hateten katak valór rezisténsia sira sei la lakon kuandu juventude sira, estudante, universitáriu sira foti, disemina no sensibiliza ba populasaun tomak iha ita-nia rain.
“Kria atividade husi estudante sira ne’e, atividade ida pozitivu tebes, ho valór rezisténsia sira ne’ebé mak iha, fó forsa ba sira atu hala’o sira-nia atividade di’ak liután nu’udar estudante, sai ba implementa iha área traballu idaidak nian,” hateten Reitór Francisco Miguel Martins ba jornalista sira iha salaun INFORDEPE, Balide-Díli, ohin, hafoin abertura semináriu, ne’ebé organiza husi Fakuldade Medisina, Siénsia no Saúde (FMSS).
Semináriu ne’e organiza hodi komemora Loron Nasionál Juventude ba da-13 no Masakre 12 Novembru ba da-27.
Reitór universidade públika ne’e reforsa katak ho valór rezisténsia sira, sei enkoraja estudante eh joven sira hodi partisipa másimu iha serbisu diária idadak nian.
“Estudante, joven sira mak sei sai dinamizadór ba prosesu dezenvolvimentu nasionál, haree didi’ak, tane didi’ak valór rezisténsia ne’e hodi hakonu espiritu juventude idaidak nian atu bele partisipa di’ak liután iha prosesu dezenvolvimentu país nian,” hateten reitór Francisco Miguel Martins.
Reitór mós louva tebes inisiativa kreativa joven hodi valoriza valór rezisténsia sira ne’eb’e joven sira halo uluk iha tempu rezisténsia liubá. “Ne’e inisativa kreativa ida kapas,” louva reitór ba AAE (Asosiasaun Akadémika Estudantil), FMSS.
Iha abertura ba semináriu sensibilizasaun, Prezidente Ezekutivu AAE-FMSS, Adão do Carmo de Jesus akresenta katak hanesan jerasaun foun/kontinuadora Repúblika Demokrátika Timor-Leste (RDTL) nian, hanesan joven, presiza tebes atu rona direta husi autór hirak ne’ebé mak partisipa no kontribui ba iha prosesu ukun aan rai-doben ida ne’e nian.
No, iha esperansa katak liuhusi eventu importante ne’e bele hametin liután sira-nia patriotizmu no nasionalizmu.
“Ami orgullu. Orgullu tanba bele rona direta istória husi autór no sasin moris sira. Aban bainrua, ami-nia jerasaun sira tuir mai kala sei haree no lee de’it ona iha livru sira,” konsidera prezidente AAE-FMSS, Adão do Carmo de Jesus.
Entretantu, semináriu sensibilizasaun ne’ebé organiza husi AAE-FMSS ne’e mai husi reprezentante Komité 12 Novembru hodi ko’alia kona-ba Papel Juventude Mate Restu 12 Novembru 1991 iha Tempu Rezisténsia Sai Hanesan Matadalan ba Juventude Kontinuadór iha Prosesu Konstrusaun Estadu.
Inklui, Eis-ministru Negósiu Estranjeiru no Kooperasaun, José Luís Guterres hodi ko’alia kona-ba Valoriza Sakrifísiu Rezisténsia Juventude Hodi Hametin Unidade Nasionál.
Partisipante ba semináriu ne’e alende estudante UNTL, iha mós reprezentante universitáriu husi ensinu privadu sira nomós Estudante Ensinu Sekundáriu sira iha Díli laran.
Jornalista: Rafy Belo
Editór : Manuel Pinto
