DILI, (TATOLI) – Ministru Obras Públikas, Salvador Soares dos Reis Pires, hateten Govenu iha planu dezenvolve sistema distribuisaun bee moos ne’ebé desentraliza, tanba agora dadauk sistema sentralizadu iha fatin haat hanesan Benemauk, Lahane, Kakaulidun no Komoro.
“Govenu iha planu dezenvolve sistema distribuisaun ne’ebé desentraliza atu halo transmisaun, entaun harii sentru abastesimentu bee iha bairru laran atu uma kain sira asesu bee besik sira nia uma”, tenik ba jornalista sira iha otél Timor, ohin.
Nia dehan problema falta bee ba komunidade agora tanba sentralizadu iha fatin haat besik foho ne’ebé presiza desentraliza no harii fali sentru abastesimentu iha bairru, nune’e bainhira bairru sira lahetan bee fasil atu deteta no kontrola iha área fornesimentu bee, nune’e mós atu halo manutensaun.
“Kuandu sistema sentralizadu, sé mak besik liu sistema sentrál ne’e nia mak sei hetan bee barak liu no ba sira ne’ebé mak dook husi fatin ne’e bainhira iha koneksaun ilegál difísil atu kontrola”, katak.
Tuir governante ne’e ezekutivu iha ona planu tanba agora iha ona master plan no tinan oin sei tau osan atu dezenvolve, dezeñu detalladu, nune’e 2020 komesa implementa kontrusaun sistema distribuisaun bee iha kapitál.
Alende ne’e, nia esplika Governu iha hanoin halo estudu viabilidade atu lori bee husi Railaku Glenu nian mai Dili, tanba agora dadauk depende tebes bee husi rai okos ne’ebé iha 26 estasaun mak uza atu fornese bee ba komunidade tuir nesesidade.
“Ita prodús purvolta litru miliaun 50 bee kada loron ba populasaun 200.000 resin (sensus tinan 2015) iha kapitál, loloos ita prodús tuir nesesidade iha Dili tanba ita presiza de’it litru miliaun 40 kada loron”, afirma.
Hodi hatutan: “Ami hanoin atu reativa ekipa sira uluk, haree problema bee atu asegura komunidade bele asessu bee ho di’ak. Ida ne’e hanesan esforsu no ita sei servisu maka’as atu halo tanba bee moos ba komunidade ne’e reponsavel no hein atu planu sira bele realiza”.
Entretantu Banku Nasional Aziátiku (ADB-sigla inglés) halo ona planu bee moos ba kapitál, Same, Vikeke, Baukau no Lospalos, planu ne’e entrega ona ba Governu liuhosi Ministériu Obras Públikas.
Jornalista: Julia Chatarina
Editora: Rita Almeida
