DÍLI, (TATOLI)-Instituisaun Akadémika, Universidade Nasionál Timor Lorosa’e (UNTL) lansa rezultadu peskiza kona-ba “Moras Prinsipál iha Ánimal”. Pezkiza ne’e hala’o husi akadémiku UNTL, Acácio Cardoso Amaral no lansa direta husi Reitór UNTL, Francisco Miguel Martins, perante akadémiku UNTL sira.
“Iha moras lubuk ida ne’ebé mak transmite ba animál, moras ne’ebé endémiku liu, kómum liu iha animál, iha Timor-Leste, iha manu purezemplu Pox, New Desease. Moras iha karau; brucellosis afeta ba karau Timur, maibé ida ne’e mós bele afeta ita ema,” informa Peskizadór Acácio Cardoso Amaral ba jornalista sira, iha Kampus Liceu-UNTL, ohin.
“Iha mós moras endémiku iha karau nian, moras Septisemia Epizotika (SE), iha kuda nian, bolu naran moras Sura nomós moras barak tan,” hatutan Peskizadór Acácio Cardoso, hodi reforsa mós katak rezultadu hotu deskreve ona iha livru, no sei tau iha biblioteka sira UNTL nian, atu estudante nomós ema hotu bele asesu.
Peskizadór UNTL ne’e mós informa katak lansamentu rezultadu peskiza ne’ebé aprezenta liuhusi livru ne’e, la’ós kona-ba moras hothotu tanba livru ki’ik nomós lansamentu ida ne’e nu’udar lansamentu ba daru’ak nian.
“Ne’e edisaun daruak, edisaun dahuluk hala’o tiha ona iha 2014, iha momentu ne’ebá, Ministériu Agrikultura i Peska mak uza ba ajente pekuária sira iha munisípiu hotu iha Timor-Leste,” haktuir dosente UNTL ne’e.
Maske nune’e, tuir nia, depois tinan haat, iha revizaun minor balun, informasaun balun la relevante, hasai, informasaun di’ak balun aumenta tan.
“Depois tinan haat, ita lansa tan edisaun daruak nian. Iha edisaun daruak ida ne’e, públiku bele asesu iha biblioteka UNTL nian, iha Fakuldade Agrikultura no biblioteka sentrál, iha Infordepe,” reforsa tan prezidente, IPB (Instituto Politécnico de Betano)-Maunfahe, ne’e.
Livru peskiza ne’e imprime husi sentru impresaun, Ministériu Edukasaun, Juventude no Desportu (MEJD) no organizadu husi Diresaun Jerál ba Diseminasaun Informasaun no Investigasaun Sientífika, UNTL. Livru rezultadu peskiza “Moras Prinsipál iha Ánimál” inskreve ho númeru ISBN (International Standard Book Number), 978-989-8915-07-8.
Iha fatin hanesan, Reitór UNTL, Francisco Miguel Martins akresenta katak aprezentasaun rezultadu peskiza estudante, inkluzivamente Fakuldade Agrikultura (FA) nomós Fakuldade Medisina, Siénsia no Saúde (FMSS) ne’e rezultadu peskiza esperimentál ba sira-nia monografia, atu hetan grau lisensiatura.
“Rezultadu esperimentál maibé sira hatudu rezultadu peskiza ida ótimu, di’ak tebes,” apresia profesór universitáriu husi ensinu superiór públiku, UNTL.
Entretantu, lansamentu rezultadu peskiza no aprezentasaun sira husi sívita akadémika UNTL, iha ámbitu komemorasaun “dies natalis” loron moris UNTL nian ba dala-18, ne’ebé komemora anualmente iha 17 novembru.
Jornalista: Rafy Belo
Editór : Manuel Pinto
