DÍLI, (TATOLI)-Instituisaun akadémika públika Timor-Leste, Universidade Nasionál Timor Lorosa’e (UNTL) komemora “dies natalis” ka loron moris ba dala-18, iha sábadu (17/11/018) ho lansamentu biblioteka dijitál (e-library).
Biblioteka ne’e lansa tanba parseria entre UNTL ho empreza telekomunikasaun Indonézia ne’ebé mak opera iha Timor-Leste, Telkomcel.
“Durante tinan 18 ninia ezisténsia, UNTL nafatin konsolida aan nu’udar sentru exelénsia ensinu superiór no peskiza sientífika iha Timor-Leste, buka kumpri nia misaun servisu públiku nian liuhusi nia fakuldade sia no programa pós-graduasaun no peskiza,” hateten Reitór UNTL, Francisco Miguel Martins, iha nia diskursu, perante akadémiku, públiku no entidade relevante, iha Kampus Sentrál-UNTL.
Reitór UNTL hatutan, tema subordinadu ba komemorasaun dies natalis ba dala 18, ba ensinu superiór ne’e mak ‘Formação baseada na auto-exelência, na cidadania qualificada e confiavel-A UNTL acredita no futuro’ ne’e refleta misaun UNTL nian.
Katak, promove ensinu exelénsia, liuhusi programa akadémiku kompetetivu iha nível nasionál no internasionál, fomenta prezervasaun, dezenvolvimentu no artikulasaun identidade no valór timoroan sira nian liuhusi promosaun istória, kultura no lian no fomenta atividade investigasaun hodi hodi kontribui ho forma kriadora ba dezenvolvimentu Timor-Leste nian.
Inklui, promove baze alargada partisipasaun interinstitusionál, fila ba integrasaun iha kultura sientífika diferente ba kriasaun sinerjia inovadora ba ensinu no investigasaun.
Presta servisu ho kualidade no diversifikadu ba komunidade, di’ak hodi kontribui ho forma relevante ba dezenvolvimentu sosiál no kualifikasaun rekursu umanu nomós kontribui ba dezenvolvimentu kooperasaun internasionál no ba aproximasaun entre povu, liliu iha domíniu edukasaun, koñesimentu, siénsia no teknolojia.
“Refleta misaun universidade nian, enkuantu fatór xave ba futuru Timor-Leste, artikula formasaun no investigasaun kualidade, potensialidade nu’udar sidadaun edukadu no konfiável,” akresenta akadémiku UNTL ne’e.
Reitór UNTL, Francisco Miguel Martins akresenta tan katak UNTL iha objetivu koletivu fundamentál ba futuru ita-nia joven sira nian, ita-nia nasaun no tenke iha atensaun husi governu.
“Komemorasaun dies natalis nu’udar data importante, ne’ebé permite mai ita hodi refleta kona-ba ita-nia lala’ok enkuantu komunidade akadémika,” realsa Reitór Francisco Miguel Martins.
Relasiona ho biblioteka dijitál (e-library), reitór UNTL dehan, bilioteka ne’e fó hakat ida lais tebes, atu hakbesik ho universidade di’ak sira iha Ázia no ligasaun ida ho universidade Europeia sira, ne’ebé sai mehi reitór ho ekipa reitória no sivitas akadémiku sira-nia mehi mós.
UNTL presiza iha kualidade maka foin bele kompete ho universidade sira iha nasaun seluk tanba ne’e dalan ida liuhusi mobilidade estudante ba portugál, Japaun, Coreia, Austrália no nasaun seluk, inklui dosente sira.
“Ita mós partisipa iha peskiza, publikasaun hamutuk no supervizaun ba peskiza sira iha universidade rai-li’ur sira iha área ne’ebé solisita,” informa reitór UNTL.
Entertantu, lansamentu biblioteka dijitál UNTL nian, operadór telekomunikasaun Telkomsel, simbolikamente entrega husi Diretór Ezekutivu, Yogi Rizkian Bahar ba UNTL.
Serimónia entrega no simu kartaun asesu estudante nian ne’e, asiste direta husi estrutura makro no mikro UNTL nian, estudante sira, konvidadu, reprezentante governu nomós autoridade timoroan sira balun tan.
Jornalista: Rafy Belo
Editór : Manuel Pinto
