DILI, (TATOLI) – Parlamentu Nasionál (PN) liuhosi Vise Prezidente Parlamentu Nasionál, Maria Angelica Sarmento, apresia ho família vítima sira ba kazu akontesementu Kuluhun Kraik, tanba bele kolabora ho Estadu hodi kria estabilidade no pás iha rai laran, hodi submete kazu ne’e liuhosi dalan legál.
“Sira aberta atu koopera ho instituisaun polisiál ho tribunál atu lori prosesu ne’e ba oin tuir dalan legál, enkuantu parlamentu louva tebes maturidade família vítima nian ne’ebé iha”, Maria Angelica Sarmento ba jornalista sira iha PN, ohin.
Nune’e PN fó votu sentidu iha loron aban, tanba parlamentu mós horiseik simu ona vizita reprezentante família matebian ne’ebé espresa sira nia vontade di’ak atu koopera ho seguransa.
Enkuantu Provedór Direitu Umanu sira no Justisa (PDHJ-sigla portugés), Jesuina Maria Pereira Gomes, hateten lori PDHJ nia naran hato’o sentidu kondolénsia ba família vítima.
Tanba ne’e husu ba autoridade públiku labele ho arbitráriu oho ema individu, sira iha dever atu respeita no proteze ema nia direitu. Nune’e PDHJ toma pozisaun sériu ba kazu omesidiu ne’ebé komete hosi membru PNTL balun ne’ebé hamate ema nain tolu, lima kanek.
PDHJ sei loke prosesu investigasaun ho inisiativa rasik bazea ba lei númeru 7/2004 artigu 35 ne’ebé foku ba investigasaun no violasaun direitu umanu ka direitu ba moris no violasaun.
PDHJ sei haruka karta ofisiál ba komandante jerál PNTL hodi deklara PDHJ nia pozisaun hodi akompaña prosesu, no sujere ba komandante jerál atu prosesu investigasaun kriminál ne’ebé hala’o hela tenke imparsiál no transparante, nune’e bele garante prinsípiu legalidade, justisa no lia loos.
Entretantu, PDHJ enkoraza ba komunidade liuliu família vítima atu iha nafatin fó konfiansa ba instituisaun seguransa Estadu hodi servisu no hala’o kna’ar ho profesionalizmu.
Jornalista: Zezito Silva
Editora: Rita Almeida
