DÍLI, (TATOLI)- Ministériu Negósiu Estranjeiru no Kooperasaun, Dionísio Babo Soares informa iha konferénsia imprensa konjunta ho Asistente Ministra ba Dezenvolvimentu Internasionál no Pasífiku Austrália nian, Senadora Anne Ruston katak durante sorumutu, ko’alia atu alarga tan bolsu estudu Austrália ba timoroan sira.
“Timoroan barak estuda iha Austrália. Ami rua ministra ko’alia katak alarga tan bolsu estudu ba timoroan i depois joven australianu barak sei mai liuhusi programa new plan, mai serbisu iha Timor-Leste. Tanba ida ne’e mak ita defende relasaun bilaterál ida forte liu ho Austrália, hanesan país viziñu,” informa Ministru Dionísio Babo Soares, iha Ministériu Negósiu Estranjeiru no Kooperasaun (MNEK), Praia dos Coqueiros-Díli, tersa (21/11) lorokra’ik.
“Buat ne’ebé ha’u hakarak temi mós tanba ita país ida ne’ebé mak rezolve ita-nia problema marítima liuhusi parametru lei internasionál sai hanesan modelu boot ba mundu ohin loron,” reforsa tan governante timoroan ne’e.
Ministru Dionísio Babo Soares mós hateten, Austrália no Timor-Leste iha relasaun ne’ebé forte no exelente tebes. Relasaun ne’ebé hahú kedas funu mundiál daruak to’o agora.
Relasaun bilaterál nian, kabe ba área kooperasaun oioin. “Ita-nia relasaun ho Austrália, nia abut ba relasaun ema ho ema liuhusi istória iha tempu uluk nomós ajuda agora ajuda ita barak tebes, liliu povu australianu dezde kedas ita-nia luta rezisténsia to’o ohin loron,” dehan governante ne’e.
Iha biban ne’e, Ministériu Negósiu Estranjeiru no Kooperasaun, Dionísio Babo Soares akresenta tan katak liuhusi relasaun bilaterál Timor-Leste no Austrália, Ita mós nota benefísiu signifikativu tebes husi ita-nia Seasonal Worker Program, ne’ebé durante ne’e Austrália fó ba ita timoroan.
Governu Austrália deside atu aumenta tan oportunidade ba timoroan atu ba moris no serbisu iha Austrália iha setór barak, iha eskema foun.
Nune’e, diplomata Dionísio Babo Soares fiar katak iha kapítulu foun ne’ebé Austrália no Timor-Leste asina liuhusi tratadu fronteira marítima, komesa ona iha fórum ida naran Forum Official Meeting, ne’ebé timoroan sira sei diskute hamutuk ho Austrália, para depois loke tan oportunidade ba timoroan hodi serbisu iha Austrália.
“La’ós de’it serbisu buka osan mas também buka esperiénsia, matenek hodi bele lori fali mai ita-nia rain,” konsidera Ministru Negósiu Estranjeiru no Kooperasaun, Dionísio Babo Soares.
Iha fatin hanesan, Asistente Ministra ba Dezenvolvimentu Internasionál no Pasífiku Austrália nian, Senadora Anne Ruston informa katak durante nia estadia iha Timor-Leste ko’alia kona-ba asuntu importante balun, tan Austrália no Timor-Leste nu’udar belun ne’ebé besik malu liu, liliu saida mak sei hala’o iha futuru, ida mak skema ba Seasonal Worker Program.
“Hahú ohin, ami sei serbisu hamutuk ho governu Timor-Leste, ko’alia kona-ba traballadór timoroan sira ba Austrália hodi serbisu iha périodu naruk hodi serbisu iha indústria ketaketak, halo treinamentu,” haktuir Senadora Anne Ruston hodi demonstra mós Austrália nia apresiasaun.
Iha biban ne’e, tuir komunikadu ne’ebé Ajénsia TATOLI asesu husi embaixada Austrália iha Timor-Leste, deskreve katak Austrália nia parseria ho Timor-Leste kle’ur no importante. “Iha tinan ne’e, Austrália sei fornese dolár australianu millaun 91 resin ba iha asisténsia dezenvolvimentu,” refere komunikadu ne’e.
Jornalista: Rafy Belo
Editór : Manuel Pinto
