DILI, (TATOLI ) – Lider igreja katólika, Reverindísimu Bispu Dioseze Dili, Don Virgílio do Carmo da Silva, SDB, fó hanoin ba joven sira prepara aan hodi kontribui ba dezenvolvimentu nasionál.
“Mundu agora dijitál no mosu mídia sosiál, tanba ne’e husu ba joven sira atu prepara aan hodi kontribui ba dezenvolvimentu nasionál”, hateten Bispu Dom Virgílio do Carmo, SDB, iha nia homília, bainhira prezide misa agradesimentu Universidade Nasionál Timor Lorosa’e (UNTL), iha ámbitu komemora dies natalis ba dala-18 iha Katedrál Maria Imaculada da Conceição, ohin.
Dom Virgílio mós husu ba joven sira atu aproveita mídia sosiál ne’e ho di’ak, tanba tuir bispu dalaruma iha prosesu aprendizajen nia laran estudante balun la fó atensaun ba profesór tanba prekupadu ho telemovel.
Lider másimu igreja katólika ne’e sujere ba foin sa’e sira atu sai fini ne’ebé di’ak hodi prepara aan estuda no peskiza hodi kontribui.
Iha homília ne’e mós, Bispu Dioseze Dili, Dom Virgílio da Carmo hato’o mensajen Sua Santidade Amu Papa Francisco nian ba sarani no estudante sira ne’ebé mak partisipa iha misa ne’e katak “Família atu la’o nafatin iha seriedade, presiza Lisensa, Deskulpa no Perdaun”.
Enkuantu, iha entrevista ho profisionál komunikasaun sosiál sira, Reverindísimu Bispu Dioseze Díli, Dom Virgílio do Carmo, SDB, hateten iha tinan létivu foun ninian, UNTL mai ho tópiku; Joven Apostolu ba Joven, tanba ida ne’e Reverindísimu Bispu hamutuk ho UNTL agradese ba Maromak, nune’e mós enkoraza dosente no estudante sira ne’ebé maka hala’o kna’ar ensinu superiór públiku ne’e.
“Ita hotu hatene universidade ne’e nasionál, maibé maioria ema katólika. Nune’e igreja iha nia papel atu kontinua hamanas joven sira-nia fiar, tanba foin dadauk ha’u tuir enkontru iha Roma hamutuk ho Amo Papa no bispu sira ko’alia liu kona kona ba joven. Tanba ne’e, iha tinan ne’e, iha Dioseze Díli, ita foka liubá foinsa’e sira, liliu ba foinsa’e kátolika ninian,” haktuir Bispu Dioseze Díli, Dom Virgílio do Carmo, SDB.
Amo Bispu mós, iha biban ne’e, agadese ba UNTL tanba bele lori joven sira besik liu ba Maromak atu nu’une’e sira bele dezenvolve di’ak liu ita-nia rai.
Iha fatin hanesan, Pró-reitór UNTL, Asuntu Administrasaun, José Honorio informa katak selebrasaun misa hodi komemora loron moris instituisaun akadémika UNTL, hanesan mós preparasaun ba graduasaun UNTL nian, ne’ebé sei realiza iha 10 dezembru tinan ne’e, inklui hakbesik estudante sira ba iha igreja.
“Selebrasaun ne’e atu fó hanoin ba estudante sira la’ós estuda de’it maibé hakbesik aan ba igreja, hakbesik aan ba Maromak. Ne’e importante iha moris lorloron nian,” hateten José Honorio ba mídia sira.
Entretantu, misa komemorasaun dies natalis UNTL ne’e partisipa husi estudante UNTL rasik nomós dosente husi fakuldade idaidak inklui sarani sira balun.
Jornalista: Rafy Belo
Editora: Rita Almeida
