DÍLI, (TATOLI)-Sekretáriu Estadu Komunikasaun Sosiál (SEKOMS), Merício Juvinal dos Reis “Akara” enkoraja graduadu na’in 42 husi Sentru Formasaun DESK (Direitu Ekonómiku Sosiál no Kultura) atu kontinua aprende nomós sujere graduadu sira atu implementa teória no prátika ba iha serbisu fatin para labele hela de’it ho téoria. Ida ne’e importante.
“Kontinua aprende, hadi’a di’ak liután. Aprende nafatin, labele para. Aprende, prátika, kontinua,” enkoraja Sekretáriu Estadu Komunikasaun Sosiál, Merício Juvinal dos Reis “Akara” iha nia intervensaun, perante graduadu no família graduadu sira, iha salaun Eskola Tékniku Vokasionál (ETV), Becora-Díli, ohin.
Sekretáriu estadu mós konsidera katak órgaun no instituisaun akadémika; Universidade Nasionál Timor Lorosa’e (UNTL) nomós UNITAL (Universidade Oriental Timor Lorosa’e) ne’ebé iha kursu komunikasaun sosiál mós dalaruma sei iha problema hanesan rekursu umanu no fasilidade.
“Ita tenke haree problema ida ne’e, ita-nia problema hotu. Ita hotu fó solusaun,” dehan Sekretáriu Estadu, Merício Juvinal dos Reis “Akara” hodi konsidera katak setór komunikasaun importante ba demokratizasaun atu garante transparénsia.
Iha biban ne’e, sekretáriu estadu mós akresenta tan katak problema iha komunidade mídia mak ekonomia-saláriu mínimu.
Katak, saláriu ba jornalista sira simu, mínimu entre dolár 115-250 kada fulan. Ho saláriu mínimu tenke obriga jornalista sira balun buka tan servisu seluk. Situasaun ida ne’e lori jornalista sira balun hala’o serbisu la ho objetividade no bazea ba faktus, inklui seluk tan.
Nune’e, atu responde ba preokupasaun sira ne’e, tuir Sekretáriu Estadu Komunikasaun Sosiál, Merício Juvinal dos Reis “Akara”, Governu da-walu iha ona programa sira hanesan; apoia no reforsa Ajénsia Notísia Timor-Leste nian, TATOLI.
Apoiu no reforsa Konsellu Imprensa, nu’udar órgaun independente reguladór ba setór komunikasaun sosiál.
Kontinua apoiu programa diseminasaun kona-ba asaun governativa, hodi promove koñesimentu públiku nian ba asaun governativa ho transparénsia ne’ebé boot liu kona-ba governasaun.
Kontinua apoiu RTTL, E.P, inklui hadi’a infrastrutura fízika ho atualizasaun ekipamentu tékniku nomós iha implementasaun planu estratéjiku id aba imprensa, atu nune’e bele hadi’a kualidade ho kuantidade informasaun ne’ebé divulga.
Propoin ba Parlamentu Nasionál atu aprova lejislasaun hodi regula setór komunikasaun audiovizuál (rádiudifuzaun/lei) iha Timor-Leste.
Estabelese institutu ba formasaun jornalista no kontinua aposta iha formasaun jornalista ba dezenvolvimentu no diversifikasaun setór ida ne’e.
Dezenvolve mekanizmu kooperasaun intersetoriál ne’ebé bele poténsia (ka optimiza) uzu língua ofisiál koretu husi jornalista sira.
Dezenvolve mekanizmu ba kooperasaun intersetoriál hodi fomenta no divulga lian ofisiál ba populasaun tomak.
Apoiu Konsellu Rádiu Komunitáriu no estabelesimentu rádiu komunitáriu foun. Apoia asosiasaun jornalista nasionál sira.
Insentiva asesu no promove partisipasaun feto iha órgaun komunikasaun sosiál. Inkrementa ka dezenvolve perspetiva kona-ba jéneru iha órgaun komunikasaun sosiál no insentiva kampaña no programa ne’ebé bele promove lian ofisiál sira, identidade nasionál, edukasaun ba sidadania, kna’ar feto nian iha sosiedade no koñesimentu tékniku no sientífiku. Inklui, promove diversifikasaun órgaun komunikasaun sosiál nomós iha nível munisipál.
Iha fatin hanesan, Diretór Ezekutivu Sentru DESK, Júlio “Gil” da Silva Guterres parabeniza graduadu formasaun jornalizmu multimedia na’in 42 nomós akresenta katak ‘Jornalista ne’e ema ki’ak no sei la sai riku’ perante públiku, iha nia diskursu.
“Nafatin sai jornalista sira ne’ebé la iha kór. Parabéns! Subliña diretór Júlio “Gil” da Silva Guterres, hodi kongratula mós graduadu Sentru Formasaun Jornalizmu Multimedia.
Enkuantu, reprezentante inan-aman, Otelio Ote, nu’udar mós jornalista seniór ida enkoraja graduadu sira katak sai jornalista tenke hakerek bebeik, labele para.
“Sai jornalista ne’e katak lorloron tenke hakerek. Se loron ida, ha’u la hakerek ona, signifika ha’u la iha,” subliña jornalista seniór, Otelio Ote hodi konklui.
Entretantu, Graduasaun DESK ne’e bele realiza tanba formandu sira tuir ona formasaun no hala’o ona estájiu iha instituisaun mídia públiku, privada nomós entidade relevante ba komunikasaun sosiál seluk tan.
Jornalista: Rafy Belo
Editór : Manuel Pinto
