DILI, (TATOLI) – Sekretáriu Estadu Arte no Kultura, Teofilo Caldas, hateten governasaun da-ualu tinan oin hahú implementa projetu konstrusaun biblioteka nasionál iha área Hudi-Laran Dili.
“Tempu badak ita sei anúnsiu konkursu publiku hodi hahú konstrusaun”, dehan nia bainhira informa planu ne’e ba Xefe Governu, Taur Matan Ruak, iha Palásiu Governu, ohin.
Tuir nia prosesu konstrusaun drainazen no moru ba biblioteka nasionál nee atinje ona porsentu 65.
Kompaña ENI Austrália apoiu orsamentu milliaun $10 hahú kedas iha 2008 maibé prosesu konstrusaun atraza to’o ohin tanba rai.
“Biblioteka ne’e remata sei prezerva livru siénsia no istória hodi fasilita ita nia komunidade, liuliu estudante sira”, tenik.
Alende ne’e nia mós informa ba Primeiru-Ministru kona-ba planu asaun anuál ba 2019 hodi fó apoiu grupu artezenatu no arte muzika hodi dezenvolve sira nia talentu hodi promove kultura nasaun iha rai liur no rai laran.
Nune’e mós prezerva uma lisan ho ninia orijinalidade iha munisípiu hotu, no planu iha 2020 sei harii sentru kulturál iha munisípiu hotu hodi fasilita komunidade.
Jornalista: Agapito dos Santos
Editora: Rita Almeida
