DILI, (TATOLI) – Eis Prezidente Repúblika, José Ramos Horta, fiar katak iha tempu badak nia laran lider nasionál sira sei tuur hamutuk atu rezolve polítika rai-laran.
Nia dehan antes ne’e, Xanana Gusmão, Marí Alkatiri no Taur Matan Ruak, hirus malu maibé tanba sira iha vontade no sentidu Estadu ne’ebé aas sira hakuak malu fila fali.
“Diálogu entre lider sira sei akontese tanba ha’u koñese Xanana, Marí Alkatiri, Taur Matan Ruak no Lú Olo, katak ohin sira bele satiadu ka hirus malu maibé bele di’ak malu lalais de’it”, Horta ba jornalista sira iha Palásiu Prezidente Nicolau Lobato, Bairru Pité, tersa ne’e, relasiona ho asuntu diálogu entre lider nasionál sira atu solusiona impase.
Premiadu Nobel Dame 1996 ne’e haktuir lider hirak ne’e hirus malu iha 2017 no 2018 tanba kestaun políitika balun maibé iha loron ruma nia laran ka semana ruma nia laran sira sei tuur hamutuk.
“Taur Matan Ruak nu’udar luta armada, atuál Prezidente Repúblika mós luta armada hamutuk ho Xanana iha ai-laran. Entaun, sira na’in tolu maka tenke hakuak malu atu hetan dalan ida ne’ebé di’ak”, lider rezisténsia ne’e afirma.
Jornalista: Xisto Freitas
Editora: Rita Almeida
