iklan

NASIONÁL, JUSTISA

“Labele Esklui Ema Hosi Dezenvolvimentu”

“Labele Esklui Ema Hosi Dezenvolvimentu”

Provedora Direitus Umanus no Justisa, Jesuina Maria Ferreira Gomes (datoluk hosi imajen liman karuk), bainhira komemora Loron Universál Direitus Umanus hamutuk ho Gabinete Prezidente Repúblika iha Palásiu Prezidente Nicolau Lobato, segunda horsehik. Imajen Mídia PR

DILI, (TATOLI) – Provedora Direitu Umanu no Justisa (PDHJ-sigla portugés), Jesuina Maria Ferreira Gomes, hateten kuandu esklui ema ida hosi dezenvolvimentu ikus mai sei selu ho kustu boot, tanba ne’e di’ak liu investe no respeita ema hotu, tratamentu iguál no inkluzaun.

“Provedoria Direitu Umanu no Justisa apresia ho partisipasaun grupu barak iha eventu ohin no sei serbisu hamutuk ho parte hotu ba asuntu dezenvolvimentu inkluzivu, liu-liu liga ho asuntu ema ho defisiénsia”, Jesuina dehan liuhusi ninia intervensaun bainhira komemora Loron Universál Direitu Umanu ba dala 70 hamutuk ho Gabinete Prezidente Repúblika iha Palásiu Prezidente Nicolau Lobato, Bairru Pité, segunda ne’e.

Nia haklaken “Igualdade, Naun Diskriminasaun, Partisipasaun no Responsabilidade”  sai prinsípiu iha deklarasaun Universál Diretu Umanu ne’ebé fundamentál tebes.

Jesuina hatutan setór privadu iha papél importante hodi respeita, promove no realiza direitu umanu no nia sente orgullu tanba iha kompañia neen iha jullu tinan ne’e asina ona regra konduta ONU nian ba negósiu sira hodi hapara diskriminasaun hasoru ema ho difisiénsia.

“Orgullu tanba kompañia hirak ne’e hola parte hamutuk ho kompañia besik 200 inklui Kompañia global hanesan Google, Microsoft no sel-seluk tan promove direitu umanu”, Jesuina haktuir.

Provedora ne’e dehan maske alkansa ona progresu barak maibé sei enfrenta hela dezafiu atu ema hotu bele goza sira nia direitu, liu-liu feto no labarik barak iha Timor-Leste sofre violénsia iha uma no eskola, ema barak moris iha pobreza, hasoru difikuldade asesu ba edukasaun no saúde ho kualidade, nesesidade bázika hanesan bee-moos no sanitasaun seidauk sai realidade ba ema hotu.

“Iha oportunidade ida ne’e ami hakarak husu ba Governu atu hasa’e investimentu iha área hirak ne’e (nesesidade bázika) no husu finanseiru ne’ebé sufisiente atu hasa’e ema nia kapasidade hodi serbí povu ho kompromisu no atetudi loloos ne’ebé hatudu respeita ba ema hotu”, tenik.

Nia mós hateten loron 9 Dezembru sai nu’udar Loron Mundiál Kontra Korrupsaun no konsidera korrupsaun kria dezigualdade, pobreza no sai inimigu ba dezenvolvimentu.

“Korrupsaun fó impaktu boot ba ema nia direitu, liu-liu direitu asesu ba eskola, asisténsia médika, padraun moris di’ak ba ema hotu no seluk tan”, akresenta.

Nia subliña saudozu Kofi Annan nia prinsípiu sosiedade demokrátika ida ne’ebé di’ak no saudável, harii ho pilár tolu maka hanesan Pás no Estabilidade, Dezenvolvimentu Ekonomia  nomós Respeitu ba Lei no Direitu Umanu.

“Dala barak ema sukat nasaun nia susesu haree de’it ba pás, estabilidade no dezenvolvimentu ekonomia maibé haluha tiha pilár datoluk katak laiha nasaun ida maka prósperu nafatin kuandu la respeita lei no direitu umanu”, katak Jesuina.

Entretantu, Eis Premiadu Nobel ba Pás, José Manuel Ramos Horta, liuhusi ninia mensajen ba ne’e katak Timor-Leste nu’udar nasaun ne’ebé joven maibé naran hahú foer ona iha mundu tanba korrupsaun.

“Ne’e halo ita nia dignidade monu. Ita luta ba independénsia ne’ebé rezulta ema lubuk ida mate, maibé ikus mai ita rona liuhusi Estatístika Mundiál katak ita nia korrupsaun buras liu-tan fali Indonézia. Ne’e duni, iha loron ida ne’e, ita presiza halo kompromisu maka’as liu-tan para hatún korrupsaun iha Timor-Leste”, afirma.

Jornalista: Xisto Freitas

Editora: Rita Almeida

iklan
iklan

Leave a Reply

iklan
error: Content is protected !!