DILI, (TATOLI) – Ministru Reforma Lejislativa no Asuntu Parlamentár, Fídelis Leite Magalhães, hatete governu sei buka alternativa hodi sosa asaun hosi kompañia ConocoPhillips no Shell ne’ebé asina ona.
“Alternativu ka mekanizmu saida mak governu sei opta, imi sei akompaña”, Ministru ba jornalista sira iha Parlamentu Nasionál, ohin.
Ministru Fidelis afirma governu rona ona informasaun katak prezidente veta ona alterasaun lei ba atividade petrolífera, maibé sei akompaña Primeiru-Ministru iha debate Orsamentu Jerál Estadu (OJE) 2019, nune’e sei iha mekanizmu atu hatan situasaun ne’e.
Iha fatin hanesan Vise Prezidente Parlamentu Nasionál, Maria Angelina Sarmento, hateten aktu polítiku hosi prezidente nian veta alterasaun lei atividade petrolífera fó impaktu duni ba estratejia polítika kona-ba sosa asaun sira ConocoPhillips ho Shell tuir mehi dada kadoras greater sunrise mai Timor-Leste.
“Estadu bele uza ka buka alternativu seluk hodi viabiliza estratéjika polítika kona-ba sosa asaun, maske AMP (Aliansa Mudansa ba Progesu) seidauk hanoin atu foti alternativu saida mak bele foti hodi rezolve situasaun”, katak deputada hosi bankada Partidu Libertasaun Populár ne’e.
Entretantu, Prezidente Repúblika, Francisco Guterres Lú Olo, veta ona alterasaun lei atividade petrolífera.
“AMP sei buka alternativu seluk, tanba ida ne’e iha konsekuénsia boot ba ita nia fundu petrolíferu no konsekuénsia ba ita nia investimentu iha setór petrolíferu”.
Jornalista: Zezito Silva
Editora: Rita Almeida
