Governu no Kompañia Hala’o Rituál ba Konstrusaun Portu Tibar
DILI, (TATOLI) – Governu liuhosi Ministru Transporte no Komunikasaun, Agostinho da Silva, ho dirijente kompañia hosi China Harbour Lda, konkorsiu Timor Port hamutuk ho lia-nain no autoridade lokál, ohin hala’ao seremonia rituál hodi husu lisensa no matak malirin hodi apoia kontrusaun Portu Tibar.
Projetu Parseira Públika Privada entre Governu no kompañia ne’e ho orsamentu milliaun $270 ho implementasaun durante tinan tolu hahú 30 agustu 2018 to’o 30 agustu 2021.
“Antes atu hahú projetu ita tenke halo uluk seremonia rituál kulturál para husu protesaun no matak malirin ba ema no kompañia atu implementa prosesu konstrusaun bele la’o di’ak no susesu”, katak Ministru Agostinho da Silva ba jornalista sira iha Tibar, munisípiu Likisa, ohin.
Lia-nain no autoridade suku Tibar maka hamulak hodi husu lisensa ba natureza bazea ba pedidu hosi Governu no kompañia implementadór projetu.
“Urat hosi animál sira neébe oho laiha sinál negativu ruma maka atu impede prosesu konstrusaun ne’e”, hateten.
Ho seremonia ne’e parte rua (governu no kompañia), komunidade ho autoridade munisípiu Likisa espera prosesu implementasaun bele la’o ho susesu hodi apoiu atividade ekonomia iha rai-laran.
Jornalista: Agapito dos Santos
Editora: Rita Almeida
