DILI, (TATOLI) – Klibur Foinsa’e Humanitarian (KFH) ho inisiativa, voluntariamente loke pré-eskolár ka jardin infánsia iha iha postu administrativu Kristo Rei, suku Hera, munisípiu Dili dezde ezisténsia, tanba haktuir ba vizaun klibur ne’e nian katak Timoroan Hotu Tenke Matenek.
Pré-Eskolár ne’e funsiona no hala’o ho gratuitu durante prosesu aprendizajen tomak hahú husi inísiu to’o ramata ho voluntáriu KFH sira.
“Ami loke kursu fulan tolu seidauk atinji ba vizaun ne’e, timoroan hotu seidauk matenek. Ita hala’o kursu naun-formál inglés, portugés seidauk atinji vizaun, entaun ami tenke hakat tan pasu ida, loke edukasaun formál, tenke hahú baze kedas; pré-eskolár. Ami planeadu, halo ona primeira pedra iha Hera, agora iha hela faze konstrusaun”, Prezidente KFH, Chiquito Soares, ba jornalista sira iha salaun Universidade Orientál Timor Lorosa’e (UNITAL), Avenida Liberdade Imprensa, Bekora, ohin.
Prezidente KFH informa mós hafoin graduasaun ne’e sira sei kontinua fali planu ne’ebé mak planeadu ona katak 2020 ne’e prosesu aprendizajen ne’e tenke la’o ona. “Tinan ida ne’e nia laran ne’e faze konstrusaun”, haktuir.
Orsamentu ne’ebé mak alokadu ba konstrusaun establesimentu pré-eskolár ne’e, tuir Prezidente KFH, Chiquito Soares, katak mai husi membru voluntáriu ativu KFH nian, tuir kbiit ekonomia idaidak nian.
“Kada ema ida quinze dolares, vinte doláres. Saida mak ami iha, kontribui. Husik hela lima sent (sentavu-red), tau lima sent para salva ita-nia maluk sira seluk. Ida ne’e mak ami-nia hakarak”, dehan.
Entretantu, KFH tuir informasaun ne’ebé TATOLI asesu husi KFH rasik haktuir klibur ne’e estabelese husi estudante universitáriu sira iha loron 16 maiu 2015.
Ezisténsia husi klibur ne’e atu fasilita kursu inglés, portugés no formasaun ba komunidade no estudante sira iha teritóriu Timor laran tomak ho espiritu umanitarian.
Ezisténsia klibur ne’e tanba deskobre problema sosiál iha komunidade nia leet mak hanesan ekonomia, finanseiru (osan), oportunidade no distánsia.
Ho razaun ne’e mak KFH hakarak oferese oportunidade ne’e ba maluk timoroan hotu ho gratuitamente atu garante kualidade edukasaun formál liuhusi kontribuisaun edukasaun naun-formál para bele garante rekursu umanu ba futuru iha nasaun ne’e.
Klibur ida ne’e nia atividade konsege la’o ona durante tinan tolu iha munisípiu Dili inklui munisípiu 12 hanesan Aileu, Ainaru, Baukau, Ermera, Likisa, Lospalos, Maliana (Bobonaru), Manatutu, Oekusi, Manufahi, Suai (Covalima) ho Vikeke husi tinan 2015 to’o agora.
Klibur ne’e estabelese kursu inglés, portugés no formasaun primeiru périodu iha 2015 to’o périodu da-hitu totál klase hamutuk 398 no estudante graduadu husi périodu ne’e totál hamutuk na’in 5.928.
Da-ualu, nian mak ohin, realiza iha iha salaun Universidade Orientál Timor Lorosa’e (UNITAL).
Objetivu husi KFH nian mak atu fó oportunidade ba sidadaun hotu asesu ba edukasaun naun-formál, atu hasa’e koñesimentu komunidade nian liliu labarik, joven no estudante sira ba lian inglés, portugés no formasaun sira seluk. Inklui, atu prepara no produs kualidade rekursu umanu nian ba futuru iha rai doben Timor-Leste.
Jornalista: Rafy Belo
Editora: Rita Almeida
